Кеуде үлкейту, 8 литр май мен блефаропластика - жылына 1200 операция жасайтын хирургтің ашық сұхбаты

Соңғы жылдары сұлулық индустриясы қарқынды дамып келеді. Инновациялық технологиялар мен жаңа әдістемелердің пайда болуы пластикалық операцияларды бұрынғыдан да қауіпсіз, тиімді әрі кең аудиторияға қолжетімді етті. Бүгінде біз эстетикалық медицина әлеміне үңіліп, адамдарға өз келбетімен үйлесім табуға және өмір сапасын арттыруға көмектесетін әлем және Қазақстан бойынша ең танымал 10 пластикалық операция туралы сөз қозғаймыз.

Azattyq Rýhy редакциясы Қазақстанда қыз-келіншектер мен ерлер арасында қандай операциялар сұранысқа ие екенін білу үшін осы салада 13 жыл тәжірибесі бар Георгий Паикидземен әңгімелесті.

Әлем мен Қазақстандағы сұлулық стандарты ерекшеленетіндей. Әлем бойынша ең көп ота мұрынға жасалады екен.

«Мен дәрігерлер отбасында өстім. Әкем профессор, медицина ғылымдарының докторы, пластикалық хирург. Анам да профессор, медицина ғылымдарының докторы, операция жасайтын гинеколог. Қарындасым узист-дәрігер. Жалпы отбасымызбен медицина саласындамыз. Сондықтан бұл жолды таңдауым табиғи шешім болды», - дейді ол.

Маманның айтуынша, ота жасауға келген адамдар бірден кешенді түрде жасатуға келеді.

«Мен көбіне кешенді операциялар жасаймын. Мысалы, кеуде мен іш аймағын бір операция барысында қатар түзетеміз. Сондықтан нақты біреуін бөліп айту қиын. Дегенмен, Қазақстанда ең танымал операциялардың бірі – блефаропластика (қабаққа жасалатын операция). Әсіресе азиялық қабақ пішінін еуропалық үлгіге келтіру, үстіңгі қабаққа қатпар қалыптастыру жиі сұранысқа ие. Сондай-ақ липосакция, дене пішінін қалыптастыру операциялары да кең таралған. Блефаропластика, бетке дөңгелек немесе ашық лифтинг (тарту), кеудені үлкейту, кішірейту немесе көтеру, абдоминопластика (ішті тарту), дененің әр бөлігіндегі липосакция (кей жағдайда 8 литрге дейін май алу), глютеопластика (бөксені үлкейту немесе көтеру), имплант орнату сияқты барлық пластикалық операция түрлерін жасаймыз», - дейді Георгий Паикидзе.

Оның айтуынша, жұлдыздарға еліктеп, солардың бет-әлпетіне ұқсағысы келетіндер де арнайы операция жасатуға жүгінеді.

«Маған кейде «пәлендей жұлдызға ұқсағым келеді» деп келетіндер болады. Бірақ мен әр адам жеке тұлға екенін түсіндіремін. Ешкім басқа біреуге ұқсауға тырыспауы керек. Адам өз болмысымен әдемі. Егер қандай да бір өзгеріс өзіне сенімділік сыйласа, жасауға құқығы бар. Бірақ біреуге еліктеу дұрыс емес деп ойлаймын», - деді ол.

Ал, бұндай сұлулықтың ақшасы туралы сұрағымызға жауап берген ол нарықтағы отаның бағасы хирургтің тәжірибесіне байланысты дейді .

«Мысалы, кеуде үлкейту бір жерде 800 мың теңге болса, басқа жерде 1,2 миллион теңге болуы мүмкін. Айырмашылық дәрігердің біліктілігі мен тәжірибесінде. Мен жылына шамамен 1200 операция жасаймын. Ал жылына 20 ғана операция жасайтын хирургпен айырмашылық бар екені түсінікті. Ота жасатуға көбіне әйелдер жүгінеді. Олар шешім қабылдауда батылдау. Бірақ ер адамдар да аз емес», - дейді Паикидзе.

Ол атағандай, гинекомастия (ерлердің кеуде безінің ұлғаюы) мәселесімен жиі келеді.

«Бұл жасөспірім шақта немесе гормоналды өзгерістерге байланысты туындайды. Сондай-ақ ерлерге блефаропластика, іш аймағын түзету, жыныстық мүшені ұлғайту, спорттық пішін қалыптастыру операциялары жасалады. Соңғы жылдары ер адамдар арасында да пластикалық операцияға қызығушылық артқан», - дейді Георгий Паикидзе.

Сонымен, пластикалық хирургтің тізімі бойынша Қазақстанда сұранысқа ие оталар мыналар:

• Блефаропластика
• Бетке лифтинг (тарту)
• Липосакция
• Дене пішінін қалыптастыру операциялары
• Абдоминопластика (ішті тарту)
• Кеудеге жасалатын операциялар
• Глютеопластика
• Имплант орнату операциялары

Әлем бойынша көп адам мұрынды түзету операциясына жүгінеді. 

Ринопластика

Ринопластика – техникалық тұрғыдан ең күрделі әрі сұранысқа ие операциялардың бірі. Мұрын – беттің орталық бөлігі, оның пішіні сыртқы келбеттің үйлесіміне тікелей әсер етеді.Бұл операция арқылы туа біткен немесе жүре пайда болған ақауларды түзетуге, мұрынның қызметін қалпына келтіруге және бетке нәзік, жинақы көрініс беруге болады. Операция кезінде мұрынның өлшемі мен пішіні өзгертіліп, дөңестігі жойылады, танаулар тарытылады немесе мұрын ұшы түзетіледі. Перде қисайған жағдайда тыныс алуды жақсарту үшін хирургиялық түзету жүргізіледі.

Операциядан кейін шамамен 2 апта бойы гипстік таңғыш тағылады. Соңғы нәтиже 6–12 айдан кейін, ісіктер толық басылған соң анық көрінеді.

Кеуде үлкейту

Әдемі әрі жинақы кеуде – әйел сұлулығының маңызды құрамдас бөлігі. Дәл жоспарлау мен жетілдірілген хирургиялық әдістердің арқасында дене пропорцияларымен үйлесетін табиғи әрі тартымды кеуде пішінін қалыптастыруға болады.Маммопластикадан кейінгі оңалту кезеңі әдетте 2–3 аптаға созылады. Бір айдан соң айнадан жаңа бейнеңізді көресіз, ал тыртықтар шамамен алты ай ішінде толықтай білінбей кетеді.

Блефаропластика

Блефаропластика (қабақ пластикасы) бетке шаршаңқы әрі қартайған көрініс беретін салбыраған, ісінген немесе әжімденген қабақтардан арылуға көмектеседі. Бұл – әлемдегі ең сұранысқа ие anti-age операциялардың бірі. Жас ұлғайған сайын қабақ терісі жұқарып, серпімділігін жоғалтады, нәтижесінде көз астында «қапшықтар» пайда болады. Операция кезінде артық тері мен май тіні алынып, қабақ бұлшықеттері нығайтылып, көздің айқын сызығы қалыптастырылады. Нәтижесінде көзқарас ашық, жас әрі мәнерлі бола түседі.

Блефаропластика жоғарғы, төменгі қабаққа немесе кешенді түрде жасалуы мүмкін. Оңалту кезеңі 1–2 аптаға созылады.

Липосакция

Липосакция – диета мен жаттығуға көнбейтін май қабаттарын жоюдың тиімді әдісі. Арнайы құралдар арқылы іш, бел, арқа, сан, қол секілді аймақтардағы артық май алынып, дене пішіні айқындалады.Қазіргі заманғы вакуумды, вибрациялық және лазерлік әдістер тіндерге жұмсақ әсер етіп, жылдам қалпына келуге мүмкіндік береді. Оңалту мерзімі шамамен 2–4 апта.

Абдоминопластика

Абдоминопластика (іш пластикасы) көбіне босанғаннан кейін немесе артық салмақтан арылған адамдарға жасалады. Ол салбыраған тері мен әлсіреген бұлшықеттерді қалпына келтіруге көмектеседі. Операция барысында артық тері мен май алынып, іш бұлшықеттері тігіледі, бел сызығы қалыптастырылады. Қалпына келу уақыты – 3–4 апта.

Ритидэктомия

Ритидэктомия (бет тарту) – бет пен мойындағы жасқа байланысты өзгерістерді жоюға арналған кешенді операция. Ол теріні тартып, бет пішінін айқындайды.Нәтижесінде адам 10–15 жасқа жас көрінеді. Оңалту кезеңі 2–3 апта.

Мастопексия

Мастопексия (кеуде көтеру) кеуденің серпімділігі мен пішінін қалпына келтіруге мүмкіндік береді. Операция кезінде артық тері алынып, төс жоғарырақ қалыпқа келтіріледі. Қалпына келу мерзімі – 2–3 апта.

Маңдайды тарту

Маңдайды тарту (фронтлифтинг) маңдайдағы әжімдерді тегістеп, қасты көтеруге бағытталған. Әсері 5–10 жылға дейін сақталады.

Редукциялық маммопластика

Кеудені кішірейту операциясы арқадағы ауырсыну, дене қалпының бұзылуы секілді мәселелерді шешуге көмектеседі. Қалпына келу мерзімі – 3–4 апта.

Отопластика

Отопластика (құлақ пластикасы) шығыңқы немесе пішіні дұрыс емес құлақты түзетуге арналған. Операциядан кейін 7–10 күнде тігістер алынып, адам қалыпты өміріне оралады. Лазерлік әдіс ең сұранысқа ие.