Жамбыл облысы коронавируспен күреске қосымша 10 млрд теңге бөлді

Жамбыл облысының әкімдігі коронавирус инфекциясымен күреске 10 млрд теңге бөлді. Бұл туралы облыс әкімі Бердібек Сапарбаев мәлімдеді, деп хабарлайды Azattyq Rýhy тілшісі.

«Өңірде қазіргі таңда 3000-ға жуық медицина қызметкеріне қолдау көрсету мақсатында 2 миллиард теңгеден астам қаржы бөлінді. Бұл жұмыс ары қарай өзінің жалғасын табады. Бұдан бөлек, қосымша дәрі-дәрмек пен құрал-саймандар алуға 10 млрд теңгеге жуық ақша бөлдік. Оның 7 млрд теңгесі дәрі-дәрмекке,1 млрд 600 млн теңгесі «Нұр Отан» партиясының көмегімен дәрігерлерді қолдау, аз қамтылған отбасыларға қажетті дәрілерді жеткізіп, жәрдем беруге жұмсалады. Тағы бір атап өтетіні, бүгінге дейін әлеуметтік сақтандыру қоры арқылы 1800-ге жуық дәрігерге 712 млн теңгеге қосымша сыйақы берілді», - деді ол.

Өңірлік коммуникациялар алаңында өткен брифингте Сапарбаев Жамбыл облысында  ПТР-тест тапсыруға болатын 6 зертхана ғана жұмыс істеп тұрғанын атап өтті.

«Осы уақытқа дейін өңірде 65 мыңға жуық адам тест тапсырған. Соңғы мәліметтер бойынша, облыста КВИ-мен 1866 науқас тіркелді, оның 865-і симптомды, 1100-і симптомсыз, 732-і науқас ауруханаларда емделіп жатыр. Науқастарға 1850 төсек орын жабдықталған, тек қана инфекциялық төсектердің пайдаланылуы 75% құраса, 800-ден астам стационарлы төсек бос тұр. Облыста 10 компыютерлік томография жұмыс жасайды. Егер, науқастар саны өсе беретін болса, облысқа қосымша кемі 1500 төсек-орын керек болады», - деді әкім.