Бауыржан Байбек: «Тарихта қазаққа ешкім ешқашан жер сыйлаған жоқ»

«Nur Otan» партиясы Төрағасының Бірінші орынбасары Бауыржан Байбек журналист Нартай Аралбайұлының YouTube-арнасына берген сұхбатында Ресей депутаттарының көтерген жер мәселесіне қатысты пікір білдірді. Журналист аталған даулы мәселеге қатысты партияның ұстанымын сұраған, деп хабарлайды Azattyq Rýhy тілшісі abai.kz-ке сілтеме жасап.

Жақында Ресей Думасының депутаттары «Ресей Қазақстанға жер сыйлаған» деп айды аспанға бір-ақ шығарды. Осы орайда Бауыржан Байбек «Nur Otan» партиясының өкілдері алғашқылардың бірі болып, ұлттық мүддені қорғап, ресейлік қос депутатқа жауап бергенін мәлімдеді

«Ол депутаттар бұл сөзді айтқан кезде ең бірінші баға берген Айдос Сарым болды. Ол қазір біздің партия атынан Мәжіліске үміткер, саясаттанушы. Көп өтпей Павел Казанцев өз ұстанымын білдірді. Ол партиямыздың Саяси кеңесінің мүшесі, Партиялық бақылау комитетінің төрағасы», – деді ол.

2013 жылы «Nur Otan» партиясы өзінің саяси тұғырнамасын қабылдады. Сол кезде партияның ішінде кең ауқымды кездесулер, пікірталастар жүрген.  Партия зиялы қауым өкілдерімен, ҮЕҰ мүшелерімен сол құжатты талқылаған. Аталған негізгі құжатта еліміздің ең үлкен жетістігі де, құндылығы да  мемлекеттің тәуелсіздігі деп анық жазылды. Бұл бұрын да, кейін де айтылған түрлі қисық пікірлерге «Nur Otan» партиясының берген нақты жауабы болатын. Бұл жауап өзгерген емес. Партияның ұстанымы – халықтың бірлігі, ынтымағы, тұтастығы аса маңызды. Бауыржан Байбек ресейлік депуттардың мәлімдемесі арзан атқа ие болудың амалы, қара бастың қамы дейді.

«Қазақта «атың шықпаса, жер өрте» деген сөз бар ғой. Қазір хайптың уақыты. Мен бұрын бұл депутаттардың атын естіген емеспін. Олар осы сөздерімен танымал болуға тырысады», – деді ол.

Сондай-ақ ол сөзінде Қазақстан шекарасы халықаралық құжаттармен мойындалғанын, әлемнің ірі державалары еліміздің жер тұтастығына кепілдік бергенін қайта еске салды.

«Елбасы барлық шекараны шегендеді. Қазақстан ядролық арсеналдан бас тартқан кезде АҚШ, Қытай, Ресей секілді мемлекеттер құжатқа қол қою арқылы ресми түрде еліміздің территориялық тұтастығына кепілдік берген. Сондықтан шекарамыз бекітілген», – деді сұхбатында партия Төрағасының Бірінші орынбасары.

Ұлт үшін мұндай маңызды мәселеде биліктегі партияның басшылығы үнсіз қалмайтыны анық еді. Сондықтан Б.Байбек те аталған жер дауына қатысты өз ұстанымын анық жеткізді және ұлт тарихында тегін жердің болмағанын қадап айтты

«Қазақтың тарихында бізге ешкім ешқандай жер сыйлаған жоқ. Барлық жеріміз бабаларымыздың маңдай терімен, төгілген қанымен бүгінге дейін аман жетті. Енді біздің, партияның, бүгінгі буын жастардың да міндеті – тәуелсіздігімізді нығайту», - деп кесіп айтты ол.

Бауыржан Байбек сұхбат барысында Таулы Қарабақтағы қақтығыстың қандай жағдайларға алып келгенін айтып, жер дауының салдары ауыр болатынын ескертті.

«Осындайда Елбасының «Тәуелсіздікті алу қиын. Ал оны ұстап қалу одан да қиын» деген сөзі еске түседі. Қазіргі таңда қағаз жүзінде өзін егеменбіз деген ел көп. Бірақ де-факто өзге мемлекеттер билеп жатыр. БҰҰ мәліметі бойынша, 60 жуық мемлекет әлі де шекара мәселесін толықтай шешпеген», - деп ойын қорытындылады ол.

Сұхбатының соңында партия Төрағасының Бірінші орынбасары тарихты білмейтін адамдардың теріс ойына бола көршілермен қарым-қатынасымыз бұзылмауы керек екенін баса айтты.

Бауыржан Байбектің YouTube–арнаға берген сұхбаты жақын күндері жарияланады.