«Ақ жол» партиясының Республикалық сайлауалды штабының таныстырылымы өтті

Биыл 3 қарашада республикалық және партияның барлық филиалдарында осындай аймақтық штабтар құрылған

Республикалық штабтың басшысы – Азат Перуашев, ал Болат Өтепбаев пен Айгүл Жұмабаева орынбасарлары болып тағайындалды. Штабқа орталық аппараттың барлық жауапты қызметкері кірді. Сайлау алдындағы құрылтайдан кейін штаб құрамына партиялық тізімдегі кандидаттар да енгізілді.

Отырыс барысында Азат Перуашев штабтың қазіргі ұйымдастырушылық жұмысы туралы айтып берді. Осы аралықта БАҚ-пен келісімшарттар жасалып, үгіт-насихат материалдары басылып, ел өңірлерінде 317 баннер орнатылған.

«Іс-шаралардың желілік кестесі эпидемиологиялық жағдайға байланысты апта сайын жаңартылып, түзетіліп отырады. Қазіргі уақытта сенімді тұлғалардың тізімін тіркеу бойынша белсенді жұмыс жүргізілуде, кеше штаб осы мәселе бойынша кеңес өткізді», - деп атап өтті ол.

Азат Перуашев әріптестерін үгіт-насихат шараларын жүргізу кезінде бас санитарлық дәрігердің барлық нұсқауын және сайлау туралы заңдарды мүлтіксіз сақтауға шақырды.