Шпекбаевтың қызметтен кеткені туралы ақпаратқа Жемқорлықпен күрес агенттігі жауап берді
Агенттік төрағасы 4 шілдеде 63 жасқа толады
Сыбайлас жемқорлыққа қарсы іс-қимыл агенттігінің басшысы Алик Шпекбаевтың қызметтен кеткені туралы әлеуметтік желіде тараған ақпаратқа аталған ведомствоның баспасөз қызметі жауап берді, деп хабарлайды Tengrinews.kz.
Айта кетейік, бұған дейін танымал блогер Ербол Еділовтің Telegram-каналында Шпекбаевтың отставкасы туралы жазылған болатын.
«Кей дереккөздердің ақпаратына сәйкес, Сыбайлас жемқорлыққа қарсы іс-қимыл агенттігінің төрағасы Алик Шпекбаев зейнет жасына жетуіне байланысты қызметтен кетуге өтініш берген. Оның отставкасын қабылдау туралы шешімді Мемлекет басшысы қабылдайды», - делінген аталған жазбада.
Ведомство өкілдері бұл ақпарттың шындыққа жанаспайтынын айтты.
Айта кетейік, Алик Шпекбаев аталған агенттікті 2019 жылдың маусым айынан бері басқарып келеді. 4 шілдеде ол 63 жасқа толады.
