Елбасы қазақстандықтарды Ораза айт мерекесімен құттықтады

ҚР Тұңғыш президенті Н.Ә.Назарбаев барша қазақстандықтардың қасиетті Ораза айт мерекесімен құттықтады, деп хабарлайды Azattyq Rýhy.

«Құрметті отандастар! Баршаңызды мұсылмандардың қасиетті Ораза айт мерекесімен құттықтаймын! Рамазан айының аяқталғанын білдіретін бұл мейрам исламның ең басты рухани құндылықтары – жақсылықты, кең пейілділік пен мейірімділікті дәріптейді. Ислам бәрімізді бейбітшілікке, бірлік пен тұрақтылыққа шақырады. Бұл құндылықтар мұсылман үмбетімен бірге барлық дін өкіліне жақын. Сондықтан біздің елімізде Ораза айт діни сеніміне қарамастан күллі қазақстандықты біріктіре түседі. Осы дәстүрлерді одан әрі нығайту, адамгершілік құндылықтарды бағалай білу маңызды. Бұл – Қазақстанның тұрақты және сенімді дамуының негізі»,-дейді Елбасы.

Сондай-ақ, ол мереке күндері игі істер жасап, көмекке мұқтаждарға қолдау көрсетуге шақырды.

«Мереке күндері жақсы істер жасалып, жақын адамдарға қамқорлық, мұқтаж жандарға қолдау көрсетіледі. Мейрам қоғамдағы өзара түсіністік пен келісімді нығайтуға септігін тигізеді.Осынау қастерлі күн секілді біздің өміріміз де игі істерге, ізгі ойлар мен мейірімділікке толы болсын. Барша қазақстандыққа рухани күш-қуат, зор денсаулық және бақ-береке тілеймін! Ораза айт қабыл болсын!»,-деген ол құттықтауында.