ШұғылҚазақстанда тағы 716 адамнан коронавирус анықталды

«Jas Otan» ұйымының жаңа төрағасы сайланды

Партия Лидері Нұрсұлтан Назарбаевтың келісімімен «Jas Otan» Жастар қанатының төрағасы қызметіне Елнұр Бейсенбаев сайланды

Фотода: "Жас Отанның" бұрынғы төрағасы Дәулет Кәрібек және жаңадан сайланған басшысы Елнұр Бейсенбаев

«Елнұр Бейсенбаевтың жастар саясатында тәжірибесі мол. Студенттік жылдары жастар ұйымдарының белсенді мүшесі болған. Ол мемлекеттік қызметте және үкіметтік емес ұйымдарда да жұмыс істеді. Осыған дейін ұйымда төраға болған Дәулет Кәрібек Президенттік кадрлық резерв тізіміне еніп, енді өзінің жастар саясатындағы мол тәжірибесін мемлекеттік қызмет саласында іске асырады», - деп хабарлайды Nur Otan партиясының баспасөз қызметі.

Жастар қанаты Орталық кеңесі мүшелерінің қатысуымен өткен жиында партия Төрағасының Бірінші орынбасары «Jas Otan» Жастар қанатының алдында жаңа мақсаттар мен міндеттер тұрғанын алға тартты.

«Еліміздің жарқын болашағы үшін жасотандықтар үздіксіз қызмет етуі тиіс. Елбасы, партиямыздың Төрағасы Нұрсұлтан Назарбаев маслихаттың барлық деңгейінде жас депутаттар санын 20%-ға дейін көбейту қажеттігін айтты. Бұл ретте «Jas Otan» Жастар қанатының рөлі ерекше. Аталған тізімде жасотандықтар алғашқылардың бірі болып тұруы қажет. Қасым-Жомарт Тоқаевтың ұсынысымен 2020 жыл «Волонтер жылы» болып жарияланды. Осы орайда, «Jas Otan» еліміздегі ең ірі жастар ұйымы ретінде, волонтерлік қозғалысты өрлетуде алдыңғы қатарда тұруы тиіс», - деді Бауыржан Байбек.

Сондай-ақ, ол әзірленіп жатқан 2020-2025 жылдарға арналған «Жастар-Отанға!» бағдарламасында білім алу, жұмысқа орналасу, баспана сияқты т.б. жастар үшін өзекті мәселелер қамтылатынын жеткізді. Осы орайда, барша Қазақстан жастарына арналған бағдарламаның жобасын әзірлеу жұмыстарына әрбір ауылдың, ауданның, қаланың жастары атсалысуы қажет екенін ерекше атап өтті.