Нұрсұлтан Назарбаев Конституциялық Кеңестің отырысына қатысты

Нұрсұлтан Назарбаев Конституциялық Кеңестің отырысына қатысты, деп хабарлайды  Azattyq Rýhy тілшісі Елбасының ресми сайтына сілтеме жасап. 

Жиында Қазақстан Республикасының «Тұрғын үй қатынастары туралы» Заңының 107-бабының 8) тармақшасын конституциялық емес деп тану туралы мәселе қаралды. 

«Азаматтардың тұрғын үй құқықтарын іске асыру мәселесі мемлекеттің әлеуметтік саясатының басым бағыты», - деді Қазақстанның Тұңғыш Президенті. 

Іс-шара барысында Үкімет, Парламент Сенаты және Мәжілісі, Жоғарғы Сот, Бас прокуратура өкілдері мен сарапшылардың пікірі тыңдалды. 

Заңның аталған нормасы жетілмегені және азаматтардың конституциялық құқықтарын жүзеге асыруға кедергі келтіруі мүмкін екендігі айтылды. 

Жиынға қатысушылардың пікірлері мен жауаптарынан кейін Конституциялық Кеңес нормативтік қаулы қабылдады. Аталған қаулы басылымдарда жарияланады. 

«Мемлекеттік әлеуметтік саясат тұрғысынан заңнамалық базаны жетілдіру ерекше маңызға ие», - деді Нұрсұлтан Назарбаев. 

Сонымен қатар тұрғын үй құқығын іске асыру мәселесі халықтың әл-ауқатына тікелей байланысты екендігі айтылды. 

«Менің тапсырмам бойынша бірнеше мемлекеттік бағдарлама іске асырылды. Бұрын баспана сатып алуға мүмкіндігі болмаған қазақстандықтар үшін тұрғын үйдің қолжетімділігі қамтамасыз етілді», - деді Елбасы.

Сондай-ақ, Нұрсұлтан Назарбаев Ата Заңды құрметтеу және қатаң сақтау елдің сәтті дамуының кепілі екендігін және Конституцияның 25 жылдық мерейтойы қарсаңында бұл мәселенің өзектілігі артып отырғандығын атап өтті.

Айта кету керек, «Тұрғын үй қатынастары туралы» Заңының 107-бабында Мемлекеттiк тұрғын үй қорынан немесе жеке тұрғын үй қорынан жергiлiктi атқарушы орган жалдаған тұрғын үйден басқа тұрғын үйдің берiлмеу негiздерi көрсетілген.