ШұғылҚазақстанда COVID-19 вирусын жұқтырғандар саны 870 мыңнан асты

Алматы облысы: Қаратал ауданында тіркелген 5 кандидаттың біреуі әйел

Бақылаушылар ауданда саулау кезінде заңсыздық тіркелмегенін айтты

Алматы облысы Қаратал ауданы бойынша Бастөбе және Жолбарыс батыр ауылдық округтеріне әкімдер бүгін сайланады. Әр округте 3 кандидаттан бар. Олардың бесеуі – ер, біреуі – әйел адам.

Кандидаттардың төртеуі өзін ұсынған, екеуі «Nur Otan» партиясының өкілі.

Бастөбе ауылдық округіне қарасты Жылыбұлақ ауылындағы №551 сайлау учаскесінде 418 сайлаушы тіркелген. Түске дейін 100-і дауыс беріп үлгерген.

«Бүгінгі сайлау науқанында тұрғындардың белсенділігін атап өткен жөн. Барлығы азаматтық-құқықтық жауапкершілігін негізге ала отырып, өз үміткеріне дауыс беруде. Біз тұрған учаскедегі сайлау әділ, ашық, айқын негізде өтуде. Сайлау барысында ешқандай заңға қайшы әрекеттер анықталған жоқ», - дейді «Nur Otan» партиясының атынан келген бақылаушы Рауза Досмағұлова.

Ауданда 8 сайлау комиссиясы, 48 комиссия мүшесі жұмыс істейді.

Айта кетерлігі, Жылыбұлақ ауылындағы №551 сайлау учаскесінде тіркелген 10 сайлаушы үйден дауыс берген. Қаратал ауданындағы Бастөбе ауылдық округінде – 3486, Жолбарыс батыр ауылдық округінде – 1649 сайлаушы саяси науқанға қатысып, өз әкімдерін таңдамақ.