Ауыл шаруашылығы министрлігі Маңғыстау мен Қызылордада мал өлімі тоқтағанын хабарлады

Маңғыстау ауыл шаруашылығы жануарлары Ақтөбе, Атырау және Солтүстік Қазақстан облыстарына тасымалданатын болды. Бұған дейін хабарланғандай, көктемгі жауын-шашынның болмауына байланысты Маңғыстау облысы мен Қызылорда облысының Арал ауданында қатты құрғақшылық болып, мыңдаған бас мал аштан өлген еді.

Ауыл шаруашылығы министрлігінің баспасөз қызметі хабарлағандай, Маңғыстау облысының тұрғындарына көмек ретінде республиканың басқа өңірлерінен екі апта ішінде 13 мың түп және 92 орам шөп әкелінген. Қосымша, Қостанай облысы апта сайын 5 вагоннан кебек жөнелтуде. Ақтөбе және Атырау облыстары Маңғыстаулық шаруаларға өз аумақтарында шөп шабуға мүмкіндік берді.

«Шөп сатып алуды «Каспий» ӘКК қаржыландырды (204 млн теңге). Өз кезегінде Азық-түлік корпорациясы 637 тонна арпаны 17%-ға төмендетілген бағамен сатты. Маңғыстау облысының агроқұрылымдарында малдың қыстауы үшін және жеке қосалқы шаруашылықтардың жем сатып алуы үшін Үкімет резервінен 1,9 млрд.теңге бөлінеді. Онымен қоса, жайылымдық жағдайлары жазғы жаюды жүзеге асыруға мүмкіндік беретін Бейнеу және Қарақия аудандарына малды тасымалдау жүзеге асырылып жатыр. Сондай-ақ, Ақтөбе, Атырау және Солтүстік Қазақстан облыстарының аумағына жаз кезінде мал жаю үшін 2260 бас жылқы, 3 мың қой, 200 түйе және 1010 бас ірі қара мал тасымалданды», - делінген министрліктің таратқан хабарламасында.

Жалпы алғанда, Маңғыстау облысындағы жағдай тұрақтанды, мал өлімі тоқтаған. Қызылорда облысының Арал ауданына жоңышқа жеткізу ұйымдастырылды, сонымен қатар, мың тоннадан астам шөп, 40 тонна құнарлы жем түсті. Азық-түлік корпорациясы арқылы 600 тонна арпа сатып алу туралы келісім-шарт жасалды. Сондай-ақ, жем-шөпті 10-15% арзандатылған сату бойынша ауыл шаруашылығы жәрмеңкесі өткізілді.

«Бұдан басқа, жергілікті бюджет қаражаты есебінен азық құнын субсидиялауға 3,4 млрд.теңге көлемінде қаражат бөлу туралы мәселе қарастырылуда. Қызылорда облысының Арал ауданындағы жағдай да тұрақтанды, мал өлімі фактілері тіркелмеді», - деп хабарлады ведомствоның баспасөз қызметі.