Президент «Қазақстан темір жолы» басшысына тапсырма берді

Мемлекет басшысы «Қазақстан темір жолы» ҰК» АҚ басқарма төрағасы Нұрлан Сауранбаевты қабылдады, деп хабарлайды Azattyq Rýhy Ақорданың ресми сайтына сілтеме жасап.

Қасым-Жомарт Тоқаевқа ұлттық компанияның жұмысы мен жүзеге асырылып жатқан жобалары жайында мәлімет берілді.

Нұрлан Сауранбаевтың айтуынша, 2021 жылдың бірінші тоқсанында жүк айналымының көлемі пандемияға қарамастан 53,4 миллиард тонна-шақырымды құраған, бұл өткен жылғы осы кезеңнің деңгейімен сәйкес келеді. Биылғы қаңтар-наурыз айларында «Қазақстан темір жолы» ҰК» АҚ желісінде 60 миллион тоннадан астам жүк тиелді. Бұл былтырғы жылдың сәйкес кезеңімен салыстырғанда 2 пайызға артық. Ел ішінде 40 миллион тоннадан астам жүк тасымалданды, аталған көрсеткіш өткен жылмен салыстырғанда 3 пайызға өскен.

Бұдан бөлек, Президентке жүргізілген келіссөздердің арқасында Алашаңқай – Достық және Қорғас – Алтынкөл шекаралық өткелдерінде ұзақ тұрып қалған жабық вагондар мәселесі шешімін тапқаны жайында айтылды.

«Пандемияға байланысты жолаушылар саны 2020 жылдың сәйкес кезеңімен салыстырғанда 19,5 пайызға төмендеген», - делінген хабарламада.

«Қазақстан темір жолы» ҰК» АҚ басшысы транзиттік әлеуетті, оның ішінде, Қытай – ЕуроОдақ – Қытай бағытындағы транзиттік контейнерлік тасымалды дамыту, вагондар мен локомотивтер паркін жаңарту, магистральдық теміржол желісін жаңғырту жөніндегі жобалар, сондай-ақ, цифрлық трансформация және компанияның қаржылық орнықтылығы бойынша қабылданып жатқан шаралар туралы айтты.

Кездесу соңында Қасым-Жомарт Тоқаев Нұрлан Сауранбаевқа бірқатар нақты тапсырма берді.