Жээнбеков премьер-министр лауазымына тағайындауды заңдастыруға қатысты халыққа үндеу жасады

Бүгін Қырғызстан президенті Сооронбай Жээнбеков премьер-министр лауазымына тағайындауды заңдастыруға қатысты халыққа үндеу жасады.

Ол жақында Жогорку Кенеш төрағасы сайланғанын еске салып, енді Парламент толыққанды жұмыс істей алатынын айтты. Президент Парламентке заңнаманың барлық талаптарын сақтай отырып, премьер-министр қызметіне Садыр Жапаровты бекіту мәселесін қайта қарауды және заңды жолмен реттеуді ұсынды.

Заң нормаларын бұза отырып қабылданған Жогорку Кенеш қаулылары Парламентке кері қайтарылды.

«Елдегі жағдайды тұрақтандыру және жаңа премьер-министрді басқа мемлекеттердің мойындауы үшін барлық шешімдердің заңды болуы маңызды, премьер-министрдің кандидатурасы заңнамаға сәйкес қатаң түрде бекітілсін. Парламент бұл үдерісті қолға алған соң, премьер-министрге қатысты мәселеге нүкте қояды деп үміттенемін.

Коронавирустық пандемия біздің азаматтарымыздың денсаулығына қауіп төндіреді. Қыс жақындап қалды. Балалар мектепке тыныш барып, оқуы керек. Бизнес тыныштықты жақсы көреді. Біз бұл үшін барлық жағдайды жасауға міндеттіміз. Барлық тараптарды саясаттан жасампаздыққа көшуге шақырамын. Қырғызстан – құқықтық мемлекет. Мәселелер тек қысым жасау арқылы емес, заң аясында шешілуі керек. Баршаңызды заңды сақтауға шақырамын. Біз даналық танытып, барлық қиындықты еңсеріп, Қырғызстан халқының бірлігін сақтаймыз», - деді Сооронбай Жээнбеков.

Еске салайық, 10 қазанда өткен кезектен тыс отырыста Жогорку Кенеш үкімет басшысы лауазымына Садыр Жапаровтың кандидатурасын бекітті. Заңгерлер бұл шешімінің заңдылығына күмән келтірді.