Бауыржан Байбек праймериз кезінде дауыс беру тәртібін түсіндірді

Nur Otan партиясы Төрағасының бірінші орынбасары Бауыржан Байбек Праймериз өткізу жөніндегі Орталық ұйымдастыру комитетінің отырысында партияға жаңа мүшелерді қабылдауды 11 қыркүйектен 4 қазанға дейінгі аралықта, яғни дауыс беру аяқталғанға дейін тоқтата тұру туралы шешім қабылданғанын жариялады.

«Соңғы кезде бізге жекелеген азаматтардан «өз» кандидаттарына дауыс бергізу мақсатында партияға мәжбүрлеп кіргізу туралы «арыздар» түсуде. Бұған мүлдем жол беруге болмайды деп есептеймін. Мұндай әрбір фактіні түрлі деңгейдегі партиялық бақылау комиссиясы жан-жақты қарайтын болады», - деп жазды ол.

Сондай-ақ партия төрағасының бірінші орынбасары жарғыға сәйкес партияға мүше болу еліміздің әрбір азаматының ерікті және өзіндік таңдауы екенін айтты.

«1 тамыздан бері Nur Otan-ға 25 мыңдай жаңа белсенді азамат мүшелікке өтті. Соңғы жылдары «партияластар қатарын тазарту» аясында Nur Otan-нан 256 мың адам шығарылған болатын. Бүгінде партиямыз қатарында барлығы 835 мың қазақстандық бар», - деді ол.

Бауыржан Байбек праймеризде онлайн-дауыс берудің айқындығын қамтамасыз ету үшін арнайы растау (верификация) жүйесін пайдаланылып (тұлғаны интернет-банкинг үлгісі бойынша анықтау) жатқанын атап өтті.

Жүйенің принципі: «Бір дауыс, бір ЖСН, бір мобильді нөмір және бір IP-адрес». Егер осы деректердің бірі сәйкес келмесе, онда адам «праймериз» ақпараттық жүйесіне тіркеле алмайды, яғни дауыс бере алмайды. Мұның барлығы түрлі айла-шарғыға, бұрмалаушылықтарға, сондай-ақ ықтимал жаппай дауыс беруге жол бермеу мақсатында істеліп отыр.

«Құрметті достар! Барлық тәртіп бұзу фактілері бойынша біздің 8 (800) 080 4441 (қоңырау соғу тегін) жедел желісіне не komek@nurotan.kz электронды поштасы арқылы хабарласа аласыздар. Партиялықтардың, жұртшылықтың қолдауымен біз Елбасы, Nur Otan партиясының Лидері Нұрсұлтан Назарбаев айтқандай, праймеризді ашық, әділ және баршаға тең жағдайда өткізетінімізге сенімдімін», - деп түйіндеді сөзін.