Инфляцияны ойға қонымды, қалыпты деңгейге түсіру қажет – Қасым-Жомарт Тоқаев

Президент Қасым-Жомарт Тоқаев Үкіметке инфляцияны ойға қонымды деңгейге түсіріп, шарықтап кетуіне жол бермеуді тапсырды. Мемлекет басшысы бос сөзбен қажетсіз жол карталарын әзірлейтіндерге қатаң шара қолданылатынын ескертті,  деп хабарлайды Azattyq Rýhy.

«Инфляцияны ойға қонымды, қалыпты деңгейге түсіру қажет. Оның шарықтап кетуіне жол бермеу керек. Инфляцияның не себепті жоғары болып тұрғаны белгілі, кеселдің себебі анықталды. Енді осы мәселені шешу керек. Бірақ ұсынылатын шаралар елдің дамуына кері әсерін тигізбеуі қажет. Дәл осы тұста түрлі пікір айтылып жатыр. Үкімет пен Ұлттық банкке бірлесіп нақты іс-қимыл алгоритмін әзірлеуді тапсырамын. Осы маңызды жұмысқа барлық мекеме өкілдері мен сарапшылар қатысуға тиіс», - деді Тоқаев Үкіметтің кеңейтілген отырысында.

Президент қолайсыз ахуалды шұғыл ретке келтіру қажет екенін атап өтті.

«Биылдан бастап үш жыл қатарынан инфляцияны төмендету үшін нақты шаралар қабылдау керек. Бірлескен іс-қимыл бағдарламасын сапалы орындау айрықша маңызды. Мәселені шешудің орнына бос сөзді көбейтіп, қажетсіз «жол карталарын» әзірлеу – жауапкершіліктен қашу деген сөз.  Алдын ала ескерту: ондай жағдайда қатаң шара қолданылады. Халықтың табысы артса ғана, нақты нәтижеге қол жеткіздік деп санауға болады», -  деді Тоқаев.