Қостанайда үш күн бұрын жоғалған шопан аман-есен табылды
Ол мотоциклмен мал іздеуге шығып кеткен
Қостанай облысының Жангелдин ауданында үш тәулік бұрын жоғалып кеткен малшы табылды, деп хабарлайды Azattyq Rýhy.
Шопан 21 қарашада из-түссіз кеткен
ТЖМ мәліметінше, 1979 жылы туған ер адам 21 қараша күні мотоциклмен мал іздеуге шығып, белгісіз бағытқа бет алған. Қолында телефоны болмағандықтан, оның қайда кеткенін анықтау қиынға соққан.
Іздестіру жұмыстары үш күнге созылды
Жоғалған адамды іздеуге ТЖМ бөлімшелері, полиция қызметкерлері, жергілікті атқарушы органдар, сондай-ақ жақын маңдағы ауылдардың тұрғындары қатысқан.
Құтқарушылардың айтуынша, оперативті әрі үйлесімді әрекеттің арқасында ер адам 23 қарашада аман-есен табылды.
«Аман-есен табылды»
ТЖМ өкілдері шопанның жағдайы жақсы екенін, оған ешқандай медициналық көмек қажет болмағанын атап өтті.
«Үйлесімді жүргізілген іздеу жұмыстары нәтижесінде ер адам тірі және жарақатсыз табылды», – деп хабарлады ведомство.
