Қазақстанның 14 өңірінде дауылды ескерту жарияланды

Қазақстанның 14 облысында 17 қараша күні қолайсыз ауа райы болжанды. Казгидромет таратқан дауылды ескертуге сәйкес, еліміздің солтүстігі, шығысы және батысында көктайғақ, қалың тұман және 15–20 м/с дейін жететін жел күтіледі, деп хабарлайды Azattyq Rýhy.

Түнде Қостанай облысының солтүстігі мен шығысында жаңбыр мен қар түріндегі жауын-шашын жауып, төмен тұмандар мен көктайғақ байқалады. Желдің екпіні 20 м/с-қа дейін күшейеді. Қостанай қаласында да түнде көктайғақ болады. Солтүстік Қазақстан облысында да осыған ұқсас жағдай: өңірдің батысы мен солтүстігінде түнде көктайғақ күтіледі, ал түнде және таңертең тұман түседі. Петропавлда түнде жолдарға мұз қатып, қозғалыс қиындайды.

Ақмола облысында түнде және таңертең солтүстік пен шығыс бөлігінде көктайғақ болады. Облыстың батысы, солтүстігі және шығысында тұман күтіледі, ал желдің жылдамдығы 15–20 м/с жетеді. Маңғыстау облысының солтүстігі, оңтүстігі және орталығында да тұман түседі.

Атырау облысының батысы, солтүстігі, шығысы және оңтүстігінде түнде және таңертең қалың тұман күтіледі. Атырау қаласында да көріну деңгейі төмендейді. Батыс Қазақстан облысында да жағдай күрделі: облыстың солтүстігі, оңтүстігі және шығысында тұман болжанса, Оралда түнде мен таңертең ауа райы айтарлықтай нашарлайды. Ақтөбе облысында түнгі және таңғы уақытта өңірдің солтүстігінде, батысында және орталығында тұман сақталады.

Жетісу облысының Алакөл маңында желдің екпіні 23–28 м/с-қа дейін жетуі мүмкін. Абай облысында да батыс, оңтүстік және орталық бөлігінде жел 15–20 м/с жылдамдықпен соғады. Шығыс Қазақстан облысында түнде және таңертең оңтүстік аудандарда тұман болады, ал шығысы мен орталығында жел 20 м/с-қа дейін күшейеді.

Қызылорда облысының орталығында, Түркістан облысының солтүстігі мен тау бөктерінде, сондай-ақ Ұлытау облысының солтүстік бөлігінде түнде және таңертең тұман болады. Павлодар облысының солтүстігінде таңертең және күндіз көктайғақ күтіледі.

Синоптиктер жүргізушілерді жолда барынша сақ болуға, ал тұрғындарды ауа райы өзгерістеріне дайын жүруге шақырады.