Садыр Жапаров: Енді мемлекеттік төңкерісті тек түстеріңізде ғана көресіздер

Қырғызстан президенті Садыр Жапаров билік елде енді мемлекеттік төңкерістерге жол бермейтінін мәлімдеді. Бұл туралы ол халыққа үндеуінде айтты, деп хабарлайды Azattyq Rýhy агенттігі АКИpress-ке сілтеме жасап.

Президенттің айтуынша, сайлау қарсаңында елде жағдайды ушықтырғысы келетін, «жаман ниетті» топтар бар.

«Олардың арасында бұған дейін ірі сыбайлас жемқорлық істері бойынша сотталған және сот шешімімен ірі ақша мен нысандарды мемлекетке өткізгендер бар; сондай-ақ көлеңкелі схемалары жойылғандар мен өз пайдасы үшін кек алғысы келетін, қызметінен кеткен адамдар бар. Яғни, жеке мүддесі үшін ренжіген адамдар», – деді Жапаров.

Президенттің айтуынша, қазіргі мемлекет бұрынғыдай әлсіз емес және тұрақсыздыққа жол берілмейді.

«Біз енді төңкеріс жасауға себеп бермейміз. Бұрынғы әлсіз мемлекет қазір жоқ. Енді халық кімді қолдау керегін және кім билікте болуы тиіс екенін жақсы біледі. Енді төңкерістерді тек түстеріңізде ғана көресіз», - дейді ол.

Бұдан бөлек, Садыр Жапаров елде сыбайлас жемқорлықты түбегейлі жоюға ниетті екенін айтты. Ол енді Қырғызстанда жүргізуші куәлігін ақша беріп алу мүмкін болмайтынын атап өтті:

«Енді жемқорлық болмайды. Ақша беріп, куәлік алу дәуірін ұмытамыз. Енді жүргізуші куәлігін тек өз білімі мен адал еңбегі арқылы ғана алуға болады. Әркім бұған өз білімінің және табанды еңбегінің арқасында қол жеткізуі тиіс», - деді ол.