Астанада 9 жыл бұрын болған ауыр қылмыс ашылды
Жаңа технология күдіктіні анықтауға мүмкіндік берді
2016 жылы Астанада 80 жастағы зейнеткер әйелдің өліміне қатысты ауыр қылмыс жасалған. Белгісіз ер адам әйелдің үйіне баса-көктеп кіріп, оған зорлық көрсетіп, қатыгездікпен ұрып-соғып, ізін жасыруға тырысқан. Бұл туралы ІІМ ресми интернет-ресурсы жазды, деп хабарлайды Azattyq Rýhy.
Оқиға орнын қарау кезінде криминалистер биологиялық іздерді тауып, одан ДНҚ-код бөлген. Бірақ тоғыз жыл бойы қылмыс ашылмай келген, ал қаскүнем жазадан жалтарып жүрген.
Жаңа технология күдіктіні анықтауға мүмкіндік берді
ҚР Ішкі істер министрлігінің мәліметінше, молекулалық-генетикалық зертхананың жаңа технологиялары және ДНҚ деректер базасы арқылы күдіктінің жеке тұлғасы анықталды.
«ДНҚ сәйкестігі табылған соң, 65 жастағы ер адам ұсталып, уақытша ұстау изоляторына қамалды. Ол өз кінәсін мойындады», – деп хабарлады ІІМ.
Ескі істер қайта қаралуда
Министрлік өткен жылдардағы ауыр және аса ауыр қылмыстарды ашу бойынша арнайы бақылау жүргізіп отыр.
Қазіргі заманғы криминалистикалық әдістер қылмыскерді оқиғаның өткен уақытына қарамастан анықтауға мүмкіндік береді.
«Бұл мысал ешкім әділ жазадан құтыла алмайтынын дәлелдейді,» – деді ІІМ Оперативті-криминалистикалық департаментінің бастығы Сергей Стихеев.
