Пашинянға қастандық жасаған адам сотталды
Ол екі жыл түрмеде отырады
Арменияның апелляциялық қылмыстық соты қарулы топтың командирі Ашот Минасянды заңсыз қару-жарақ, оқ-дәрі және жарылғыш заттарды сатып алу, сақтау және тасымалдау дерегі бойынша бас бостандығынан айыру жазасына кесті, деп хабарлайды Azattyq Rýhy.
Апелляциялық сот бірінші инстанция сотының шартты түрде 1 жыл 10 айға бас бостандығынан айыру туралы шешімін жойып, сол мерзімге колонияда өтеу жазасын тағайындады.
Еске салайық, Ашот Минасян 2020 жылғы 14 қарашада Армения премьер-министрі Никол Пашинянға қастандық жасауға дайындалу ісі бойынша қозғалған қылмыстық іс аясында ұсталған болатын.
Тергеу мәліметінше, оның үйінен үлкен көлемде қару мен оқ-дәрі табылған. Сонымен қатар, тергеу органдары телефон әңгімелерінің жазбасын жариялап, онда Минасянның қастандық жоспары туралы талқылағаны болжанған.
Бұл іс бойынша сондай-ақ бұрынғы ҰҚҚ директоры Артур Ванецян, бұрынғы депутат
Ваграм Багдасарян және АРФ "Дашнакцутюн" партиясының мүшесі Ашот Авакян ұсталған еді. Алайда кейін олардың барлығы айғақтардың жеткіліксіздігіне байланысты босатылды.
Арменияның Бас прокуратурасы бұл шешіммен келіспей, істі жоғары сатыдағы соттарға шағымданды.
Кассациялық сот төменгі инстанциялар бірқатар маңызды мән-жайларды ескермеді деп тауып, істі қайта қарау үшін бірінші инстанцияға қайтарды.
Нәтижесінде, тергеушінің өтініші қанағаттандырылып, 2021 жылдың 1 желтоқсанында Ашот Минасян қайта қамауға алынды, алайда 2022 жылдың қаңтарында ол елден шықпау туралы қолхатпен босатылған еді.
