Республиканың басым аумағында күн қайта суытады

Алдағы үш тәулікте Қазақстанда тұрақсыз ауа райы сақталады. Еліміздің басым аумағында жел тұрып, жауын жауады, деп хабарлады «Қазгидромет» синоптиктері.

«Жаңа Жер аймағынан келетін солтүстік циклон республиканың солтүстік-батысы, солтүстік, содан кейін орталық және оңтүстік-шығысының кей жерлерінде жаңбырды күшейтеді. 26 маусымда циклонның артынан Солтүстік-Батыс суық антициклоны ығысып, республиканың солтүстік бөлігінде күн суытады», - делінген хабарламада.

Осылайша, алдағы үш тәулікте республиканың солтүстік облыстарында түнде ауа температурасы +2 градусқа дейін төмендесе, күндіз 17 градус жылылықты көрсетеді.

Сондай-ақ, республиканың кей жерлерінде желдің күшеюі, дауыл, бұршақтың түсуі күтіледі.