Енді Қазақстандағы ер-азаматтар қайда әскерге баратынын өздері таңдай алады

Қазақстанда мерзімді әскери қызметке шақырылған сарбаздарға жаңа мүмкіндік берілді. Енді олар қызмет өтейтін әскери бөлімді өз бетінше таңдауға құқылы. Қазақстан Республикасының Қорғаныс министрлігі MyArmy.kz бірыңғай цифрлық порталын іске қосты, деп хабарлайды Azattyq Rýhy.

Бұл алаң арқылы бұрын тек жергілікті әскери басқару органдарына жеке барып қана шешілетін қызметтер онлайн форматта қолжетімді болды.

Азаматтар енді:

• мерзімді немесе келісімшарттық әскери қызметке өтініш бере алады;
• жиі қойылатын сұрақтармен танысады;
• өзекті жаңалықтар мен материалдарды оқи алады;
• кері байланыс нысандары арқылы сұрау жолдай алады.

Порталдың басты мақсаты – рәсімдерді жеңілдету, бюрократияны азайту және шақыру комиссиялары жұмысының ашықтығын арттыру.

Өтінім беру қалай жүреді?

MyArmy.kz арқылы өтініш беру үдерісі үш кезеңнен тұрады:

1. Жасалған – өтінім қабылданды, тексеру басталды.
2. Өңделуде – тексеру аяқталды, үміткер медициналық комиссияға шақырылады
3. Бұл кезеңде талап етілетін талдаулар мен анықтамалардың тізімі ұсынылады.
4. Қабылданды/Қабылданбады – медициналық комиссия мен жеке қасиеттерді зерделеу нәтижесі бойынша шешім қабылданады.

SARBAZ+ жобасы аясындағы пилоттық жоба

Жаңа портал SARBAZ+ жобасының бөлігі ретінде іске асырылды. Қазіргі таңда жоба Алматы облысындағы 78460 әскери бөлімінде сынақтан өтіп жатыр. Үміткерлерді іріктеу Алматы қаласының қорғаныс істері жөніндегі департаментінде жүргізіліп жатыр.

Сынақ сәтті өткен соң, бастама Қазақстан Қарулы күштерінің басқа да әскери бөлімдерінде қолданысқа енгізілмек.

Әскерге шақырылушыларға жаңа мүмкіндіктер

Порталдың енгізілуі мынадай артықшылықтар береді:

• қызмет жағдайларын жақсарту;
• әскерге шақырылушылар үшін әлеуметтік және білім беру мүмкіндіктерін кеңейту;
• әскери қызметті аяқтағаннан кейін алған дағдыларды азаматтық салада қолдану перспективаларын арттыру.

«Әскерге шақырылушылар өз қалауына қарай әскери бөлімді таңдай алады. Бұл шешім олардың бұрынғы мамандығына және кейінгі кәсіби дамуына бейімделіп жасалған», – делінген Қорғаныс министрлігінің хабарламасында.