Алматыға АҚШ-тан пошта арқылы келген сәлемдемеден есірткі табылды
Полицейлердің айтуынша, мұндай жағдай осыған дейін де болған
Алматыда полиция халықаралық пошта арқылы есірткі жеткізу әрекетінің жолын кесті, деп хабарлайды Azattyq Rýhy агенттігі ІІМ-ге сілтеме жасап.
ІІМ мәліметінше, АҚШ-тан келген сәлемдемеден өсімдік тектес тыйым салынған заттың қомақты мөлшері анықталған.
Алматы қаласы ПД Есірткі қылмысына қарсы іс-қимыл басқармасының бастығы Мұрат Жұмабаев мұндай жағдай алғаш рет болып тұрмағанын атап өтті:
«Бұл – жалғыз дерек емес, мұндай фактілер бұған дейін де тіркелген. Біз мұндай құқықбұзушылықтардың алдын алу үшін жүйелі жұмыс жүргізе береміз. Заң бәріне ортақ, ал жазаның бұлжымайтындығы – біздің қызметіміздің басты қағидаларының бірі», – деді ол.
Қазіргі уақытта күдіктіге қатысты сотқа дейінгі тергеу басталды. Полицияның мәліметінше, ол қамауға алынған.
