Атырау тұрғыны Нигерия азаматымен жанжалдасқаны үшін айыппұл арқалады

Автотұрақтағы жанжалдан кейін Атырау тұрғынына ұсақ бұзақылық жасағаны үшін 55 мың теңге айыппұл салынды, деп хабарлайды Azattyq Rýhy «Ақ Жайық» басылымына сілтеме жасап.

«Атырауда автотұрақта жергілікті тұрғын мен Нигерия азаматы арасында жанжал болған. Қоғамдық орындарда балағат сөздер айтқан тұрғынға қатысты «ұсақ бұзақылық» бабы бойынша әкімшілік іс қозғалды», - деп жазды басылым.

Сот хаттаманы және рапорттарды қарап, ер адамды кінәлі деп таныды. Оған 55 048 теңге көлемінде айыппұл салынды.

Шетелдік азаматтың шағымданбағанына және тараптардың татуласқанына қарамастан іс сотқа жетті.