Алматыда бойжеткен «Қазпошта» арқылы 300 дана есірткі таблеткасын жеткізген

Алматыда Полиция департаментінің есірткі қылмысына күрес бөлімінің қызметкерлері «Қазпошта» өкілдерімен бірлесіп, психотроптық заттардың ірі партиясын алуға келген адамды ұстады, деп хабарлайды Azattyq Rýhy.

Іс-шара барысында пошта сәлемдемесіне жасырылған, күшті әсер ететін препараттың шамамен 300 таблеткасы тәркіленді.

Алдын ала мәлімет бойынша, бұл препарат шетелге жөнелтуге арналған. Алушы – 31 жастағы жергілікті тұрғын.

ПД мәліметінше, күдіктіге қатысты сотқа дейінгі тергеу жүргізіліп жатыр, оның өзге де қылмыстарға қатысы бар-жоғы тексерілуде.

«Алматы полициясы үшін есірткі айналымына қарсы күрес – басты басымдықтардың бірі. Біз жеткізу арналарын бұғаттап, профилактикалық шараларды белсенді түрде жүргізіп келеміз. Азаматтарды қырағы болуға және күмәнді жөнелтімдер мен ұсыныстар туралы ішкі істер органдарына «102» нөмірі арқылы хабарлауға шақырамын», – деді Алматы қаласы ПД Есірткі қылмысына қарсы күрес Басқармасының бастығы Мұрат Жұмабаев.