«Естен шығармаңыз»: полиция халыққа үндеу жасады

Полиция барша қазақстандықты жол ережесін қатаң сақтауға шақырды, деп хабарлайды Azattyq Rýhy Polisia.kz-ке сілтеме жасап.

Полицияның мәліметінше Қазақстанда жол апаты азаймай тұр. Мысалы жыл басынан бері Алматы қаласында 4 мыңнан астам жол апаты тіркелген. Апаттар салдарынан 5 мыңнан астам адам зардап шекті, олардың ішінде өкінішке қарай, 45 адам қаза тапты.

Полицияны әсіресе балалардың жол апатына ұшырауы қатты алаңдатып отыр. Сондықтан тәртіп сақшылары барша қазақстандықты ережелерді ескерусіз қалдырмауға шақырады.

«Жол апаттарының негізгі себептері – жылдамдықты асыру, арақашықтықты сақтамау, маневр жасау мен жаяу жүргіншілер өткелінен өту ережелерін бұзу. Мұндай жағдайлардың барлығын жол қозғалысы ережелерін қатаң сақтау арқылы тоқтата аламыз», — деді Алматы қаласы ПД анықтау басқармасы бөлімінің бастығы Ержан Шайхиев.

Ол сондай-ақ жүргізушілер мен жаяу жүргіншілерді барынша сақ болуға шақырды.

«Есіңізде болсын: рөлде отырып, сіз тек өзіңіздің ғана емес, айналаңыздағы адамдардың да қауіпсіздігіне жауапты боласыз. Жолды қауіпсіз ету үшін бәріміз бірге әрекет етейік. Полиция барлық жол қозғалысына қатысушыны саналы әрекетке және жол қозғалысы ережелерін қатаң сақтауға шақырады», - деп түйіндеді Шайхиев.