Әкім 9 млн теңгеден алу үшін не істеу керектігін айтты (ВИДЕО)

Ұлытау облысына жұмыс істеуге барған жас мамандарға 9 млн теңгеге дейін төленеді. Бұл туралы өңір басшысы Дастан Рыспеков Qogam News-ке берген сұхбатында айтты, деп хабарлайды Azattyq Rýhy.

Әкім жас мамандарға берілетін бір реттік көтерме ақы мен жеңілдіктер туралы айтып берді.

«Біздің өңірде көтерме ақы қарастырылған. Көшіп келген жас мамандарға 9 млн теңгеге дейін алуға болады. Алайда қаржыны пайдаланған адам міндеттеме алады. Біздің облыста 5 жыл жұмыс істеуге тиіс», - деді Рыспеков.

Сондай-ақ, оның айтуынша, «Ұлытау жастары» деген бағдарламамен жылдық 5 пайыздық мөлшерлемемен ипотека беріледі.

«Шарты – 10 процент бастапқы жарна, максималды сома – 20 млн теңге. Жастарға бұл өте тиімді деп ойлаймын», - деп түйіндеді облыс әкімі.

Еске сала кетейік, биыл үкімет жұмысшы мамандықтарды дамытуға ерекше назар аударып отыр. Бұл мамадықтарды таңдаған барлық студент колледжде тегін оқиды. Колледждерге 150 мың студент қабылдау жоспарланған, оның 70%-ы техникалық бағыттарға бөлінді.