Теңізде 36 вирус ошағы бар: кеніштегі 27 мың жұмысшы үйіне қайтты

Атыраудағы Теңіз кен орнының коронавирус індетінің ошағына айналуына байланысты үйіне уақытша қайтарылған жұмысшылар саны 27 090 адамға жетті. Бұл туралы бүгін өңір әкімінің Үкіметтегі баяндамасында айтылды.

«Бүгінгі күні Теңіздің 94 вахталық калашығында 13 620 қызметкер тұрып жатыр. Бірінші демобилизация бойынша 19 403 адам, екінші демобилизация бойынша 7 687 адам шығарылды», - деді Махамбет Досмұхамбетов.

Мәліметке сәйкес, Теңізде вирус жұқтырудың 1039 жағдайы тіркелген. Оның бәрі – 57 мердігер компания қызметкері. Кешенде барлығы 36 ошақ табылып отыр. Қазір адамдар вахталық ауысыммен жұмысқа тек ПТР-тесттің теріс нәтижесімен келеді. Науқастар өсімі – 1,8 %.

Теңіздегі 1039 жағдайды қосқанда, Атырау облысында коронавирустың 1379 жағдайы тіркеліп отыр. Оның 200-і – қалада, 71-і – Жылыой ауданында. 8 науқас қайтыс болған.

Өңірдегі өндірістік орындардың көптігі әсерінен қауіп артатын болғандықтан, жаңа аурухана да салынбақ.

«Тек Теңіз кенішінің өзінде 35 000 мыңға жуық адам вахталық ауысыммен жұмысқа кіріседі. Сондықтан қауіп артатыны сөзсіз. Аталған мәселелерді ескере отырып, облыс аумағында модульдік инфекциялық аурухананың қажеттілігі туындап отыр. Қазір мердігер компаниялармен келіссөздер жүргізілуде. Толыққанды нәтижеге жеткен жағдайда аурухана құрылысы тамыз айының аяғында аяқталады деп жоспарлап отырмыз», - деді әкім.

Бұған дейін Жылыой, Құрманғазы, Индер аудандарында карантин жарияланған.

Абай Сейфулла, Нұр-Сұлтан