Көкшетаудың кіреберісінде бірнеше шақырымдық кептеліс пайда болды

Көкшетаудың кіреберісіндегі блок-бекеттерде бірнеше шақырымдық кептеліс пайда болды. Бұл алдағы демалыс күндері Көкшетау қаласы мен Щучинск-Бурабай және Зеренді курорттық аймағының жабылуына байланысты болуы мүмкін. Жүргіншілер екі сағаттық кептелісте тұрған деп хабарлайды Azattyq Rýhy тілшісі.

Блок-бекеттің екі жағындағы көліктер бір жарым-екі сағат бойы кезекте тұрған. Жүргізушілердің айтуынша, Көкшетау қаласына кіру қаладан шығуға қарағанда әлдеқайда қиынға соққан.

«Мен Нұр-Сұлтан қаласынан елге келе жатырмын. Кептелісте тұрғаныма міне, екі сағатқа жуықтады. Алдымда әлі біраз көлік бар. Балаларым әлі жас. Әбден шаршады. Тезірек кептелістен шығып, елге жетуді ғана ойлап отырмын», - дейді Мейірбек есімді жүргізуші.

Кептелісте санитар дәрігерлер жолаушылардың дене қызуын өлшеп, блок-бекеттің екі жағында сауалнамалар толтыратын орындар пайда болған. Сауалнамада көліктегі әрбір жолаушылардың азаматтығы, ЖСН нөмірі, төлқұжат деректері, жұмыс орны немесе оқу орнының атауы, соңғы екі аптада қай жерлерде немесе шетелдерде болу-болмауы, вирус жұқтырған адамдармен жақын қатынаста болуы немесе болмауы, телефон нөмірлері толтырылады. Жергілікті санитарлық қызмет басшылығының айтуынша, кептелістің болуы медициналық қызметкерлердің аздығына немесе сауалнама толтыруға қатысы жоқ.

«Көліктер саны әдеттегіден бірнеше есе көп болды. Менің ойымша астаналық тұрғындар курортты орындардың жабылуына байланысты Көкшетауға жетуге асыққан сыңайлы. Өйткені, Көкшетаудың маңындағы табиғат та әдемі ғой», - дейді Ақмола облысының бас санитар дәрігері Айнагүл Мусина.

Естеріңізге сала кетейік, бүгін Бурабай, Зеренді курорттық аймақтарына уақытша блок-бекеттер қойылады. Туристік нысандар 20-21 маусым күндеріне жабылады.

Абзал Алпысбайұлы, Ақмола облысы