Пойыздағы тексеріс: қай маршруттарда билетсіз жолаушылар көп кездесетіні анықталды

Жазғы маусым басталғалы бері «Жолаушылар тасымалы» АҚ-ның жылжымалы комиссиясы шамамен 140 құқықбұзушылықты анықтады, деп хабарлайды Azattyq Rýhy.

Олардың ішінде алты билетсіз жүру дерегі және рәсімделмеген 135 килограмм багажды тасымалдау жағдайы тіркелді.

Мұндай деректер «Алматы-Жезқазған», «Қызылорда-Семей», «Өскемен-Алматы», «Астана-Жезқазған», «Ақтоғай-Аягөз» және «Астана-Көкшетау» бағыттарында анықталған.

«Тексерулердің қорытындысы бойынша кінәлі қызметкерлер тәртіптік жауапкершілікке тартылды», – деп нақтылады компанияның баспасөз қызметі.

«Қазақстан темір жолы» компаниясында тексерулер жүйелі сипатқа ие екенін және тасымалдау қағидаларының сақталуын күшейту үшін барлық бағыттарда жалғасын табатынын атап өтті.