Қазақстандықтар көңіл көтеру үшін 30 млрд теңгеден астам ақша жұмсаған – зерттеу

Қазақстанның кәсіпорындары мен жеке кәсіпкерлері 2025 жылдың қаңтар-наурыз айларында шығармашылық, өнер және ойын-сауық саласында 31,5 млрд теңгеге қызмет көрсеткен. Бұл өткен жылдың сәйкес кезеңімен (24,8 млрд теңге) салыстырғанда 27,3%-ға артық, деп хабарлайды Azattyq Rýhy агенттігі Ranking.kz-ке сілтеме жасап.

Сарапшылардың есебінше, көлем бойынша көшбасшы – Астана, мұнда көрсетілген қызмет көлемі 10 млрд теңгеге жетіп, 2024 жылғы қаңтар-наурыз айларымен салыстырғанда 45,9%-ға артқан.

Екінші орында – Алматы (7,3 млрд теңге), үшінші орында – Қарағанды облысы (1,7 млрд теңге). Ең төмен көрсеткіш Ұлытау облысында тіркелген – 177,1 млн теңге (былтыр – 154,9 млн теңге). Сол сияқты тізімнің соңынан Абай облысы мен Павлодар облысы да бой көрсетті.

Қызметтердің негізгі бөлігін артистік қызмет қамтамасыз етті – 19 млрд теңге немесе жалпы көлемнің 60,2%-ы. Оның ішінде театрларға – 9,8 млрд теңге, концерттерге – 8,9 млрд теңге, ал цирктерге – 257,8 млн теңге.

Қалған қаражат мына бағыттарға бөлінді: мәдени-көріністік іс-шараларды ұйымдастыру – 8,7 млрд теңге, көркем және әдеби шығармашылық – 2,2 млрд теңге, концерт және театр залдарының қызметі – 1,7 млрд теңге.

«Шығармашылық, өнер және ойын-сауық саласындағы іс-шаралар қазақстандықтар арасында үлкен сұранысқа ие. Оларға қызығушылық жыл сайын артып келеді. Мәселен, цирктерде 2024 жылы көрермендер саны 2,6%-ға өсіп, 318,4 мың адамды құрады. Бұл көрсеткіш «коронадағдарысқа дейінгі» 2019 жылғы деңгейден асып түсті. Сонымен бірге жаңа қойылымдардың саны да артты: 2023 жылы – 8 болса, 2024 жылы – 21», – деп атап өтті сарапшылар.

Айта кетейік, жуырда Алматыда өткен Дженнифер Лопестің концерті ел экономикасына миллиардтаған теңге түскені хабарланған.