Қазақстанда көпбалалы отбасыларға берілетін жәрдемақы мөлшері артты

Қазақстанда 2025 жылдың қаңтарынан бастап көпбалалы отбасыларға және «Алтын алқа», «Күміс алқа» иегерлеріне берілетін мемлекеттік жәрдемақыларға жалпы 354,5 млрд теңге бөлінді. Бұл көмекті орта есеппен 856,2 мың отбасы алды, деп хабарлайды Azattyq Rýhy.

Жәрдемақы алғандар:

• көпбалалы отбасыларға – 308,9 млрд теңге (613,4 мың отбасы);
• наградталған аналарға – 45,6 млрд теңге (242,8 мың адам).

Шілде айындағы төлемдер

2025 жылдың шілде айында жалпы сомасы 49,7 млрд теңге төленді.

• көпбалалы отбасыларға – 43,1 млрд теңге (601,2 мың отбасы);
• марапатталған аналарға – 6,6 млрд теңге (244,9 мың адам).

Көпбалалы отбасыларға жәрдемақы мөлшері

Еңбек және халықты әлеуметтік қорғау министрлігінің мәліметінше, көпбалалы отбасыларға берілетін жәрдемақы табысқа қарамастан төленеді. Шарт – бірге тұратын 4 және одан да көп баланың (кәмелетке толмаған немесе 23 жасқа дейінгі күндізгі бөлім студенттері) болуы.

2025 жылғы төлем мөлшері:

• 4 бала – 63 030 теңге;
• 5 бала – 78 798 теңге;
• 6 бала – 94 565 теңге;
• 7 бала – 110 332 теңге;
• 8 және одан көп бала – әр балаға 15 728 теңгеден.

«Алтын алқа» және «Күміс алқа» иелеріне төлемдер

Аналарға арналған мемлекеттік жәрдемақы келесі санаттарға төленеді:

• «Күміс алқа» иелері – 25 165 теңге;
• «Алтын алқа», «Батыр ана», І және ІІ дәрежелі «Ана даңқы» ордендерінің иегерлері – 29 097 теңге.

Жәрдемақы 6,5%-ға өсті

2025 жылғы 1 қаңтардан бастап балалы отбасыларға тағайындалатын барлық мемлекеттік жәрдемақылар 6,5%-ға артты.