Мамандыққа адалдықтың үлгісі: мұнай өңдеу зауытында 33 жыл еңбек еткен маман

Қазақстанда жұмысшы мамандық бағытында еңбек етіп, еліміздің дамуына өлшеусіз үлес қосып жүрген кәсіби мамандар аз емес. Олардың бірі – Қуат Мәжитұлы Ғабдуллин. Ол – Атырау мұнай өңдеу зауытында 33 жыл еңбек өтілі бар технологиялық қондырғы машинисі, отандық мұнай-химия саласының дамуына сүбелі үлес қосқан қарапайым еңбек адамы, деп хабарлайды Azattyq Rýhy.

Энергетика министрлігінің баспасөз қызметінде жарияланған мәліметке сүйенсек, ол мектебін аяқтап, әскер қатарынан оралғаннан кейін ауылшаруашылық машиналарының техник-механигі мамандығын алып, дизельді моторист болып еңбек жолын бастаған.

Алайда оның өміріндегі маңызды бетбұрыс 1992 жылы Атырау МӨЗ-на жұмысқа орналасуымен байланысты. Содан бері үш онжылдықтан астам уақыт бойы зауытпен бірге, бір мамандыққа адал қызмет етіп келеді.

Бүгінде Қуат Мәжитұлы – «Кокс және күкірт өндіру» цехындағы баяу кокс өндіру қондырғысының машинисі. Оның әр жұмыс күні нақты есеппен басталып, сенімділікпен аяқталады: жабдықтардың қауіпсіздігі мен жұмыс барысы – оның тәжірибесіне сеніп тапсырылған.

Қуат Мәжитұлы – тәжірибелі маман ғана емес, сондай-ақ отбасына тірек, үш баланың әкесі, бес немеренің ардақты атасы. Жұмысын құрметпен атқарса, отбасын мақтанышпен әңгімелейді. Мұндай азаматтар – тек жұмысшы ғана емес, өндірістің арқа тірегі, дәстүр мен жауапкершіліктің жарқын үлгісі.