Тегін таратылмайды: Астанада Тәжікстанның өнімдері қойылған жәрмеңкеге қатысты әкімдік ескерту жасады

Астанада Тәжікстанның Соғды облысынан жеткізілген ауыл шаруашылығының өнімдері мен қолөнер бұйымдарының жәрмеңкесі өтіп жатыр. Қала әкімдігі жәрмеңкедегі заттар тек сатылатыны туралы ескерту жасады, деп хабарлайды Azattyq Rýhy.

Астана әкімдігінің мәліметінше, Тәжікстаннан келген кәсіпкерлер мың тоннадан астам ауылшаруашылық өнімдерін сатылымға ұсынды. Оның ішінде жаңа піскен жеміс-жидек пен көкөністер, кептірілген жемістер, жаңғақтар және бақша дақылдары бар.

«Келушілер сондай-ақ ғасырлар бойғы дәстүрді сақтаған тәжік қолөнерінің бірегей бұйымдарын сатып ала алады», - деп ескертті әкімдік.

Ведомство мәліметінше, жәрмеңкеде ұлттық тағамдар да сатуға ұсынылған. Күн сайын 10 қазанда кемінде 1 тонна палау дайындалып, 6 тандырда 5 мыңнан астам нан мен самса пісіріледі.

Сонымен қатар ұйымдастырушылар Тәжікстаннан келген әртістер мен шығармашылық ұжымдардың қатысуымен ерекше концерттік бағдарлама әзірледі.

Іс-шараның басты мақсаты – шағын және орта бизнестегі мемлекетаралық ынтымақтастықты дамыту мен қолдау, сондай-ақ екі ел арасындағы мәдени және экономикалық байланысты нығайту.

«Бұл – тек базар емес, нағыз мәдени оқиға. Мұндағы атмосфера сондай ерекше, шынымен де шығыс базарында жүргендей әсер қалдырады. Біз мұнда тек өнімдер мен кәдесыйлар алып қана қоймай, тәжік мәдениетінің рухын сезіндік», – деді іс-шара қонақтарының бірі.

Жәрмеңке 16 тамыз күні сағат 11:00-ден 19:00-ге дейін, ал 17 тамызда 10:00-ден 19:00-ге дейін «Барыс Арена» мұз сарайының алдындағы алаңда (Тұран даңғылы, 57) өтеді.

Айта кетейік, 2023 жылы тәжік жеміс-жидек көрмесінде тұрғындар өнімдерді талан-таражға салған еді.