Нағыз ғажайып: Өскеменде салмағы 6 кг болатын сәби өмірге келді

Өскеменде сирек кездесетін жағдай тіркелді – салмағы 6 045 грамм болатын қыз бала дүниеге келді, деп хабарлайды Azattyq Rýhy агенттігі Ана мен бала орталығына сілтеме жасап.

Өскемен қаласындағы Ана мен бала орталығында ерекше жағдай болды – салмағы 6 045 грамм болатын қыз бала дүниеге келді. Дәрігерлердің айтуынша, мұндай салмақтағы сәбилер өте сирек туады.

«Ана мен бала орталығында нағыз ғажайып орын алды – салмағы 6045 грамм болатын қыз бала дүниеге келді! Бұл тек бақытты ата-аналар үшін ғана емес, сондай-ақ босануға қатысқан барлық медициналық команда үшін нағыз қуаныш болып саналатын сирек кездесетін және маңызды оқиға», – деп хабарлады медициналық мекеме.

Дәрігерлердің нақтылауынша, ота сәтті өтіп, мамандар тобы үйлесімді жұмыс істеген. Статистика бойынша, бірнеше мың жаңа туған сәбидің тек біреуі ғана 6 келіге жетеді.

Орталықта атап өткендей, мұндай нәрестелерге, әсіресе өмірінің алғашқы сағаттарында, ерекше күтім мен бақылау қажет. Қазір сәби мен ананың жағдайы тұрақты деп бағаланып отыр.