Шымкент пен Қазақстанның бірнеше өңірінде жер сілкінісі сезілді

Бүгін, 5 тамыз күні Шымкент, Тараз қалаларында және Түркістан мен Жамбыл облыстарының 16 елдімекенінде екі баллдық жер сілкінісі болды, деп хабарлайды Azattyq Rýhy ҚР ТЖМ-нің Telegram-арнасына сілтеме жасап.

Сейсмикалық станциялар желісінің мәліметінше, жер сілкінісі Астана уақытымен 18:44-те тіркелген. Жерасты дүмпулері Қырғызстан аумағында, Алматыдан оңтүстік-батысқа қарай 408 шақырым жерде болған.

«Жер сілкінісінің энергетикалық класы – 13.1. Магнитудасы MPV 5.9. Есептік қарқындылығы – екі балл», — делінген хабарламада.

Жамбыл облысында екі баллдық жер сілкінісі мына елдімекендерде сезілді:

• Тараз қаласы;
• Шу қаласы;
• Меркі ауданының Меркі ауылы;
• Тұрар Рысқұлов ауданының Құлан ауылы;
• Байзақ ауданының Сарыкемер ауылы;
• Жуалы ауданының Бауыржан Момышұлы ауылы;
• Жамбыл ауданының Аса ауылы;
• Қордай ауданының Қордай ауылы;
• Талас ауданының Қаратау қаласы;
• Шу ауданының Төле би ауылы.

Түркістан облысында жер сілкінісі екі балл деңгейінде тіркелді:

• Шымкент қаласы;
• Түлкібас ауданының Тұрар Рысқұлов ауылы;
• Төле би ауданының Леңгір, Маңкент, Сайрам ауылдары;
• Сайрам ауданының Ақсукент ауылы;
• Қазығұрт ауданының Қазығұрт ауылы;
• Сарыағаш ауданының Сарыағаш қаласы;
• Келес ауданынның Абай ауылы;
• Ордабасы ауданының Темірлан ауылы.

Құтқарушылар жер сілкінісі кезінде сақталуы тиіс 10 қарапайым ережені еске салды:

• сабыр сақтаңыз, үрейге бой алдырмаңыз;
• дүмпу кезінде лифт пен баспалдақты пайдаланбаңыз;
• жиһаздан, терезеден, аспалы шамнан аулақ болыңыз;
• берік әрі сенімді баспана табыңыз;
• жоғарғы қабатта болсаңыз, негізгі тірек қабырғалар бұрышына жайғасыңыз;
• ғимараттан шығыңыз (көпқабатты үйде – дүмпу басылған соң);
• су, газ бен электр желісін ажыратыңыз;
• алдын ала дайындалған дабыл сөмкесін алыңыз;
• электр желілерінен, ғимараттар мен ағаштардан алыста болыңыз;
• қайталама дүмпуге дайын болыңыз, қарттарға және мүмкіндігі шектеулі жандарға көмектесіңіз.