Қазақстандықтардың зейнетақы жинағы 24 трлн теңгеден асты
Зейнет жасына толғандарға алты ай ішінде 118,79 млрд теңге төленді
Қазақстандықтардың зейнетақы жинағының көлемі 24 трлн теңгеден асып, бір жыл ішінде 4 трлн теңгеден аса немесе 20,9% өсті, деп хабарлайды Azattyq Rýhy БЖЗҚ баспасөз қызметіне сілтеме жасап.
Зейнетақы жинағы 18,7 пайызға ұлғайды
2025 жылдың 1 шілдесіндегі мәлімет бойынша міндетті зейнетақы жарнасы (МЗЖ) есебінен зейнетақы жинағы 22,85 трлн теңгеге жетіп, 12 айда 18,7% ұлғайды.
«Міндетті кәсіптік зейнетақы жарналары (МКЗЖ) есебінен зейнетақы жинағының сомасы 12 ай ішінде 10,2% өсіп, 683,10 млрд теңгені құрады. Ең көп жылдық өсімді ерікті зейнетақы жарнасы (ЕЗЖ) бойынша жинақтар көрсетті. Олар 12 ай ішінде 35% артып, 8,73 млрд теңгеге жетті», - деп жазылған хабарламада.
2024 жылғы 1 қаңтардан бастап салымшылардың (алушылардың) зейнетақы шоттарына түскен жұмыс берушінің міндетті зейнетақы жарнасы (ЖМЗЖ) есебінен зейнетақы жинағының сомасы 463,98 млрд теңге болды.
Инвестициялық табыс қанша
Жинақтар зейнетақы жарнасы, сондай-ақ инвестициялық табыс арқылы өсіп отырады. Жыл басынан бері салымшылардың жеке және шартты зейнетақы шоттарына 1 575,45 млрд теңге жарна түсті, бұл өткен жылдың сәйкес кезеңіндегі көрсеткіштен 19,8% (немесе 260,05 млрд теңгеге) артық.
МЗЖ есебі жүргізілетін жеке зейнетақы шоттарына (ЖЗШ) жыл басынан бастап 1 294,56 млрд теңге түсті (өткен жылдың сәйкес кезеңімен салыстырғанда МЗЖ көлемі 11,7% – ға ұлғайды), МЗЖ – 67,87 млрд теңге (19,8% - ға өсім), ЕЗЖ - 1,38 млрд теңге. 2025 жылдың алғашқы 6 айында ЖМЗЖ есебінен жарналар 211,65 млрд теңгені құрады.
Жыл басынан бері салымшылардың шоттарына есептелген таза инвестициялық табыс шамамен 350,7 млрд теңгеге жетіп, алдыңғы айлардағы табыстың уақытша төмендеуін тоқтатты.
Төлемдер мен аударымдар
БЖЗҚ-дан жарналардың барлық түрі бойынша жасалған төлемдер мен сақтандыру ұйымдарына аударымдар 782,87 млрд теңгені құрады. Бұл былтыр жасалған төлемдерден 325,24 млрд теңгеге (немесе 71,1%) көп.
«Төлемдердің басым бөлігі тұрғын үй жағдайларын жақсартуға және емделуге арналған біржолғы зейнетақы төлемдерінің (БЗТ) еншісінде – 451,58 млрд теңге», - деп жазылған хабарламада.
Зейнет жасына толуына байланысты 6 ай ішіндегі төлемдер – 118,79 млрд теңге.
Жыл басынан бері мұрагерлік бойынша 34,58 млрд теңге, ҚР-дан тыс жерге тұрақты тұруға кетуге байланысты 19,18 млрд теңге, мүгедектігі бар адамдарға – 1,58 млрд теңге, жерлеуге – 5,36 млрд теңге көлемінде төлем жасалды. Сақтандыру ұйымдарына 151,78 млрд теңге аударылды.
