Қазақстан АҚШ-қа жауап ретінде америкалық тауарларға баж салығын көтере ме
Бұл ел экономикасына да кері әсерін тигізбейді
Премьер-министр Олжас Бектенов Қазақстан АҚШ-тан келетін тауарларға баж салығын арттыруды жоспарлап отырмағанын айтты,деп хабарлайды Azattyq Rýhy.
«Бірден айтайын – ондай жоспар жоқ. АҚШ-тың жаңа ережелеріне тоқталайын. Біздің АҚШ-қа жіберетін экспорттың жалпы көлемінің 95%-ы осы жаңа ережеге жатпайды», – деді Бектенов Үкімет отырысынан кейінгі брифингте.
Бектеновтің айтуынша, бұл шешім ел экономикасына елеулі кері әсер етпейді.
«Ауқымды кері әсер болмайды. Біз америкалық әріптестерімізбен келіссөздер жүргізуге дайынбыз және жүргізіп жатырмыз», – деді ол.
Естеріңізге сала кетейік, жақында АҚШ президенті Қазақстаннан келетін кейбір өнімдерге 25 пайыздық баж салығы енгізілетінін мәлімдеді. Бұл шешімге қатысты мемлекет басшысы Қасым-Жомарт Тоқаев та өз пікірін білдірген еді.
