Семейлік жас дәрігер сал ауруы бар балаларды емдеудегі күнделікті жауапкершілік жайлы айтты

Мадина Саутбаева – жоғары санатты дәрігер-педиатр. Балалар денсаулығын жақсартуға бағытталған оңалту жұмысы – оның күнделікті кәсіби міндетінің ажырамас бөлігі, деп хабарлайды Azattyq Rýhy.

«Мен дәрігер-педиатр болып жұмыс істегендіктен, таңертең жұмыс күнім балаларды қабылдаудан басталады. Медбикемен бірге сүзгі бөлімінде балаларды толық тексеруден өткіземіз, оңалту қызметтерін алуға рұқсат береміз. Кейін стационарда жатқан балаларды аралап, тексеремін. Бізде тәулік бойы оңалту алып жатқан балалар бар. Олармен тұрақты түрде жұмыс жүргіземіз», – дейді дәрігер.

Мадина Саутбаеваның жұмысы тек жеке тексерумен шектелмейді. Ол – мультидисциплинарлы топтың белсенді мүшесі. Бұл топта невропатолог, психиатр, физиотерапевт, реабилитолог секілді мамандармен бірге баланың жағдайын бағалап, оңалтуға жарамдылығын анықтайды.

«Балалар қабылдауға келген кезде біз оларды кешенді түрде қараймыз. Диагноз қойылып, оңалтуға жарамдылығы туралы қорытынды жасалады. Белгілі бір уақыт өткен соң қайта тексеріп, динамикасын бақылап, қажет жағдайда емді түзетеміз», – дейді дәрігер.

Бұл орталықта сал ауруына шалдыққан (БЦП) балалар көп. Мұндай диагнозбен ауыратын балалардың көбінде қоректік және энергия жеткіліксіздігі байқалады. Осы себепті дәрігер балалардың тамақтануына, салмағына, даму көрсеткіштеріне ерекше көңіл бөледі.

«Күнделікті құжаттармен жұмыс істейміз, балалардың жағдайын мониторинг арқылы бақылап отырамыз. Тамақтануды да қадағалаймыз, арнайы мәзір әзірлейміз. Мұнда оңалту алып жатқан балалардың диагноздары күрделі болғандықтан, жұмысымыз екі есе жауапты. Мен өз ісімді сүйемін, балаларды жақсы көремін. Сол себепті де бұл мамандықты таңдадым», – дейді ол.

Мадина Саутбаева – Семей қаласындағы медициналық университетті аяқтап, жалпы тәжірибелі дәрігер мамандығы бойынша интернатураны және педиатрия бойынша резидентураны тәмамдаған. Ол бұған дейін Ұлттық ғылыми ана мен бала орталығында, сондай-ақ «Тоқтамыс» өңірлік орталығында қызмет етіп, ата-аналардың сеніміне ие болған кәсіби маман.