Абай облысында полиция бастығы қызметкерлерін таспен қуып жүр (ВИДЕО)
Видео желіде тарап, қоғамда резонанс туды
Абай облысында полиция бастығы қарамағындағы қызметкерліне рогаткамен тас атқан. Аталған факті бойынша қызметтік тексеріс тағайындалды, деп хабарлайды Azattyq Rýhy.
Оқиға орнынан түсірілген видео желіде жарияланды
Шар қалалық полиция бөлімінің бастығы әлеуметтік желіде өз қызметкерлеріне рогаткамен тас атып жатқан видеосы жарияланғаннан кейін дауға қалды.
Telegram-дағы Jagdai арнасында жарияланған жазбада ер адам, болжам бойынша Даурен Әлжаппаров, мұны күлімсіреп, «тәрбиелеу әдісі» деп атай отырып істеп жатқаны көрінеді.
Полиция не дейді
Оқиға қоғамда резонанс тудырды. Абай облысының Полиция департаменті бұл факті бойынша ішкі тексеріс басталғанын хабарлады.
«Абай облысы Полиция департаментінің жеке құрам инспекциясы оқиға орнына барып, қызметтік тергеу тағайындады. Тексеру нәтижесі бойынша қолданыстағы заңнама аясында тиісті шешім қабылданады», — делінген ведомствоның ресми түсіндірмесінде.
