«Алаяқтар менің атымнан несие алды»: Ақмола облысында әйел адам полицияға жалған хабар берген
Бөтеннің атынан несие рәсімделді деп шағымданған әйелдің өзі күдіктіге айналды
Ақмола облысында 41 жастағы әйел полицияға алаяқтық туралы арызданған. Алайда тексеріс нәтижесінде қылмыстық іс керісінше, оның өзіне қарсы іс қозғалды, деп хабарлайды Azattyq Rýhy.
Алаяқтар несие рәсімдеді деп шағым түсірген
2025 жылдың қаңтар айында Атбасар аудандық полиция бөліміне жергілікті 41 жастағы әйел келіп, өзінің келісімінсіз атына ірі көлемде несие мен микронесие рәсімделгенін айтып шағымданған. Айтуынша, ол бұл туралы банктер мен микроқаржы ұйымдары өкілдерінен түскен қоңыраулар арқылы білген.
Тергеу шындығын ашты: несиені өзі алған
Полиция қызметкерлері қажетті тергеу амалдарын жүргізіп, несиені арызданушының өзі алғанын анықтады. Несие қаражатының бір бөлігі бұрынғы қарыздарын қайта қаржыландыруға, қалғаны жеке қажеттіліктеріне жұмсалғаны белгілі болды.
Қылмыс құрамы болмағанымен, жауапкершіліктен құтылған жоқ
Тергеу нәтижесінде әйелдің әрекетінде алаяқтық белгілері жоқ екені анықталды. Дегенмен, оның полицияға қасақана жалған ақпарат бергені үшін ҚР ҚК 419-бабы бойынша (жалған қылмыс туралы хабарлау) іс қозғалды.
Кейін бұл іс ақтамайтын негіздер бойынша тоқтатылды.
