Степногорск қаласының жылу желілерін жөндеуге Үкіметтен 2,7 млрд теңге бөлінді

Энергетикалық инфрақұрылымды жаңғырту жұмыстары аясында Ақмола облысы Степногорск қаласының жылу жүйесіне 2,7 млрд теңге бөлінді, деп хабарлайды Azattyq Rýhy.

6,5 шақырым тозған желі жедел жөнделеді

Үкімет қаулысына сәйкес, бөлінген қаражат диаметрі 530 мм болатын 6,5 шақырым магистральдық жылу желілерін жедел реконструкциялауға бағытталады. Бұл желілер толық тозған, апатты жағдайға жеткен учаскелер.

Жылу желілерінің тозу деңгейі – 84,4%

Степногорск қаласындағы жылу желілерінің жалпы ұзындығы – 123,8 шақырым.

Оның ішінде магистральдық желі 1968 жылы салынған, қазіргі таңда тозу деңгейі – 84,4%.

2025-2026 жылдары ауқымды жөндеу жобасы іске асады

Ұлттық «Энергетикалық және коммуналдық секторларды жаңғырту» жобасы шеңберінде 2025-2026 жылдары қосымша 5,8 млрд теңге бөлініп, ұзындығы 9,5 шақырым, диаметрі 820 мм болатын магистральдық жылу желілері жаңартылмақ.

Алдағы жылыту маусымына дайындық

Бұл жұмыс жылыту маусымына уақтылы дайындалуға, апаттардың алдын алуға, тұрғын үйлер мен әлеуметтік нысандарға жылу үздіксіз берілуін қамтамасыз етуге мүмкіндік береді.

Степногорск: жылумен қамтылатын нысандар

Қала халқы – шамамен 46 мың адам.

• 316 көпқабатты үй;
• 65 әлеуметтік нысан;
• 342 басқа да тұтынушы жылу жүйесіне қосылған.

Жалпы жылу жүктемесі – 175 Гкал.