Астанада автожуу жұмысшысы клиентінің көлігінен 3 млн теңге ұрлап алды

Астанада жергілікті тұрғын полицияға арыз түсіріп, автокөлік жуу орнынан кейін көлігінің салонынан 3 миллион теңгеден астам қолма-қол ақша жоғалғанын хабарлаған. Бұл туралы Астана қалалық Полиция департаменті мәлімдеді, деп жазады Azattyq Rýhy.

Ұрлық жасаған күдікті Көкшетаудан табылды

Оқиғаға байланысты жедел-іздестіру шараларын жүргізген Нұра ауданының криминалдық полиция қызметкерлері күдіктінің кім екенін және қайда екенін анықтады.

Ол 28 жастағы автожуу қызметкері болып шықты. Күдікті Көкшетау қаласында ұсталып, тергеу үшін полиция бөліміне жеткізілді.

Ақша көліктің қобдишасынан ұрланған

Тергеу барысында белгілі болғандай, жас жігіт «Changan Deepal S07» маркалы көліктің қобдишасында жатқан ақшаны еш қиындықсыз жасырын түрде ұрлап кеткен.

Қылмыстан кейін күдікті жұмысқа шықпаған. Ол өз кінәсін толық мойындап, ақшаның бір бөлігін жеке қажеттіліктеріне жұмсағанын, ал қалғанын полиция қызметкерлері тәркілеп, иесіне қайтарғанын айтты.

Қылмыстық іс тіркелді

Аталған факті бойынша қылмыстық іс қозғалды. Күдікті уақытша ұстау изоляторына қамалды.

Полиция тұрғындарға ескерту жасады

Астана қалалық Полиция департаменті азаматтарды мүліктерінің сақталуына мұқият болуға, көлік салонында немесе қоғамдық орындарда құнды заттарды қараусыз қалдырмауға шақырады.