«Сапарға шықпаңыз»: ҚР СІМ Таяу Шығыстағы ахуалға байланысты қазақстандықтарға үндеу жасады

ҚР Сыртқы істер министрлігі Таяу Шығыстағы әскери-саяси ахуалдың күрт шиеленісуіне байланысты қазақстандықтарға аймаққа жоспарланған сапарға шықпауды кеңес етті, деп хабарлайды Azattyq Rýhy.

«Таяу Шығыстағы әскери-саяси жағдайдың күрт күрделенуіне байланысты Сыртқы істер министрлігі Қазақстан азаматтарына осы аймаққа жоспарланған сапарларын қайта қарауға қатысты кеңес береді», – делінген министрліктің ресми мәлімдемесінде.

Қазіргі уақытта ахуал мен ықтимал қауіп-қатерлер жан-жақты бағалануда, тиісті мемлекеттік органдармен және шетелдік серіктестермен үйлестірілген шаралар жүргізілуде.

Қауіпсіздік қатері: рейстердің тоқтатылуы және әуе қатынасына шектеулер

Таяу Шығыс аймағында бірқатар мемлекетте әуе кеңістігін пайдалануға уақытша шектеулер енгізілді. Соның салдарынан халықаралық рейстер тоқтатылып, кейінге шегерілді.

Шетелдегі қазақстандықтарға арналған СІМ-нің жедел ұсыныстары

Осыған байланысты, Сыртқы істер министрлігі Таяу Шығыс елдерінде, әсіресе Қатар мен Біріккен Араб Әмірліктерінде жүрген Қазақстан азаматтарына төмендегідей кеңес береді:

• сабыр сақтап, жергілікті билік органдарының қауіпсіздік талаптарын қатаң сақтау;
• бұқаралық іс-шараларға қатыспау және әскери нысандарға жақындамау;
• сол елдің ресми органдары мен Қазақстанның шет елдердегі мекемелерінің ақпаратын мұқият қадағалау;
• брондалған әуе рейстерінің мәртебесін және эвакуация жолдарын үнемі нақтылап отыру;
• төменде көрсетілген шұғыл байланыс арналары арқылы Қазақстан Республикасының елшіліктерімен тікелей байланыста болу.

Шұғыл байланыс мәліметтері

Қазақстанның Қатардағы елшілігі:

• +97450649955;
• +97470910579;
• kazconsul.doha@gmail.com;
• doha@mfa.kz.

Қазақстанның БАӘ-дегі (Әбу-Даби қаласы) елшілігі:

• +97124498778;
• +971503629805;
• abudhabi@mfa.kz.

Қазақстанның Дубай қаласындағы Бас консулдығы:

• +971556103341;
• +971505701978;
• dubai@mfa.kz.

Қазақстан Республикасының Сыртқы істер министрлігі:

• +7 (7172) 72 05 00

Дипломатиялық өкілдіктер қалыпты режимде жұмыс істеп жатыр

ҚР Сыртқы істер министрлігінің Таяу Шығыс елдеріндегі барлық дипломатиялық өкілдігі қалыпты режимде жұмыс істеп, жағдайдың даму барысын үнемі бақылауда ұстап отыр және Қазақстан азаматтарына тәулік бойы қажетті консулдық-құқықтық көмек көрсетуді жалғастыруда.

Айта кетейік, өткен түнде Иран Қатар еліндегі АҚШ-тың әскери базасына зымыранмен шабуыл жасағаны, бұл елден 70-тен аса қазақстандық шыға алмай отырғаны хабарланған болатын.