Павлодар облысының тұрғындары бір айыппұлды бірнеше рет төлеген
Екі млн теңгеден астам қаражат азаматтарға қайтарылды
Павлодар облысында азаматтардан заңсыз түрде екі рет төленген әкімшілік айыппұлдар бойынша қаржы қайтарылды. Бұл туралы ҚР Бас прокуратурасының Құқықтық статистика және арнайы есепке алу комитетінің облыстық департаменті мәлім етті, деп жазады Azattyq Rýhy.
Қандай заңбұзушылық анықталды?
Жүргізілген қадағалау тексерісі нәтижесінде 85 атқарушылық іс жүргізу аясында азаматтардан уақытылы төлем жасалғанына қарамастан қаражат қайтадан ұсталғаны анықталды.
Қайтарылған жалпы сома – шамамен 2 миллион теңге.
Бір айыппұл – екі төлем
Мысалы, Павлодар қаласының тұрғыны әкімшілік айыппұлды банк қосымшасы арқылы өзі төлеген. Алайда, бұл туралы жеке сот орындаушысына (ЧСИ) хабар берілмеген.
Салдарынан, банктік шотынан қайтадан 36 920 теңге ұсталып, бір айыппұл екі рет төленген.
Мұндай жағдайлар жүйелі түрде қайталанғаны айтылып отыр.
Мәселе бақылауға алынды
Қадағалаушы орган бұл мәселені ерекше бақылауға алып,
мұндай заңсыздықтардың алдын алу үшін қажетті шаралар қабылдап жатыр.
Азаматтарға кеңес:
- Егер әкімшілік айыппұлды банктік қосымша арқылы өзіңіз төлесеңіз;
- Төлем туралы сот орындаушысына хабарлауды ұмытпаңыз;
Әйтпесе, қаражатыңыз екінші рет заңсыз ұсталып кетуі мүмкін.
