Алматыда жұрттың қалтасын тонап жүрген күдікті жас жігіт ұсталды (ВИДЕО)

Алматы қаласында криминалдық полиция қызметкерлері жедел-іздестіру іс-шаралары барысында бірнеше рет қалта ұрлығымен айналысқан азаматты ұстап, оның заңсыз әрекетін әшкереледі. Тергеу мәліметтері бойынша, ұсталған азаматтың қала тұрғынының әмиянын ұрлауға қатысы бар екені анықталды. Ұрының заңсыз әрекеті бейнебақылау камераларына түсіп қалған, деп хабарлайды Azattyq Rýhy.

Полицейлер оның осыған ұқсас басқа қылмыстарға қатысы бар-жоғын тексеруді жалғастыруда.

Қалта ұрлығына қарсы жұмыс жүріп жатыр

Алматы қалалық Полиция департаменті криминалдық полиция басқармасының бастығы Талант Исаевполиция бөлімшелерінің өзара іс-қимылы мен техникалық құралдарды пайдалану арқылы қаладағы мүліктік қылмыстарды анықтап, ұстау жұмысы жүйелі түрде жүргізіліп жатқанын мәлімдеді:

«Қалта ұрыларын анықтау және ұстау жұмыстарының тиімділігі жоғары. Барлық құқық бұзушы заң аясында жауапкершілікке тартылатын болады», - деді.

Қала тұрғындары мен қонақтарына ескерту

Полиция қала тұрғындары мен қонақтарына адам көп жиналатын жерлерде абай болуға, жеке заттарын бақылауда ұстауға және кез келген күдікті жағдайларда дереу полицияға хабарласуға шақырады.