Алматы облысының 8 мыңнан астам тұрғыны қаржы пирамидасына 21 млрд теңге салып жіберген

Алматы облысында «Amanat Drive» қаржы пирамидасының былығы әшкереленді. 8 мыңнан астам адам салымшы болып, 21 млрд теңге салған, деп хабарлайды Azattyq Rýhy.

«Amanat Drive» пирамидасының схемасы қалай жұмыс істеді?

Қаржы мониторингі агенттігінің (ҚМА) Алматы облысы бойынша департаменті «Amanat Drive» атауымен жұмыс істеген ірі қаржы пирамидасының қызметін тоқтатты.

Ұйымдастырушылар азаматтарға пайызсыз бөліп төлеу арқылы жылжымайтын мүлік пен көлік сатып алуды ұсынған. Алайда бұл уәделер толық орындалмаған – активтер туыстар мен таныстардың атына рәсімделген.

21 миллиард теңге – салымшылардың шығыны

Пирамиданың арбауына 8 мыңнан астам адам түсіп, олардың жалпы салымы 21 млрд теңгеден асқан.

Заңсыз схема және жалған компаниялар

Ұйымдастырушы қылмыстық жолмен алынған кірістерді заңдастыру үшін бірнеше деңгейлі схема құрған. Ол өз бақылауындағы төмендегі компанияларды пайдаланған:

• «Алло, не керек» ЖШС;
• «i-m@rketing» ЖШС;
• «Gold SapaPremium» ЖШС.

Бұл компаниялар жалған жеткізушілер ретінде көрсетіліп, көрінген келісімшарттар арқылы 1,8 млрд теңгеден астам қаржы қолма-қол ақшаға айналдырылып, сыртқа шығарылған.

Қымбат мүлік пен көліктер сатып алынған

Қылмыстық кірістерге алынған мүліктер қатарына мыналар кіреді:

• Жеке тұрғын үйлер;
• Астанадағы пәтерлер;
• HUMMER H2 және Lexus LX570 секілді люкс автокөліктер.

Бұл активтерді тәркілеуден жасырыну мақсатында сенімді адамдардың атына рәсімдеген.

Тергеу жалғасуда

• Сот санкциясымен барлық мүлікке және тұтыну кооперативінің шоттарына тыйым салынды.

• Пирамиданың бас ұйымдастырушысы қамауға алынды.

Тергеу ҚР ҚІЖК 201-бабына сәйкес жалғасып жатыр. Қосымша ақпарат тергеу мүддесіне байланысты жарияланбайды.