Шымкентте зообақта жайылып жүрген түйеқұсты тепкен жасөспірім жазаланды

Шымкенттегі зообақта қоршаудан өтіп, түйеқұсты тепкен адам жасөспірім екені анықталды, деп хабарлайды Azattyq Rýhy.

Оқиғаға қатысты зообақ ресми пікір білдірді. Белгілі болғандай, тәртіп бұзушы – кәмелет жасқа толмаған жасөспірім.

«Ата-анасымен бірге түсініктеме алынып, ҚР қолданыстағы заңнамасына сәйкес, әкімшілік жауапкершілікке тартылды.

Жануарлардың қауіпсіздігі – біздің басты міндетіміз. Мұндай оқиғалар жануарлар үшін ғана емес, қоғам үшін де қауіпті. Келушілерден зообақ ережелерін сақтауды сұраймыз», - делінген зообақ хабарламасында.

Айта кетейік, осыған дейін Шымкентте зообақта жайылып жүрген түйеқұсты тепкен ер адамға іздеу салынғаны хабарланған болатын.