Шымкентте ЖОО басшысы 256 млн теңге ұрлағаны анықталды

Шымкенттегі М.Әуезов атындағы Оңтүстік Қазақстан университетінде аса ірі көлемдегі бюджет қаражаты жымқырылғаны және қылмыстық жолмен алынған мүлікті заңдастыру фактілері анықталды. Осы бағытта Қаржылық мониторинг агенттігі қылмыстық істі тергеп-тексеруді аяқтады, деп хабарлайды Azattyq Rýhy.

КҮДІКТІЛЕР КІМДЕР?

Күдіктілер қатарында университет ректорының міндетін атқарушы, қаржы және әкімшілік департаменттердің директорлары, сондай-ақ университетпен жұмыс істеген серіктес ұйымдардың басшылары бар.

256 МЛН ТЕҢГЕ ҚАЛАЙ ҰРЛАНДЫ?

Тергеу барысында университет басшылығы мен серіктес ұйымдардың жалпы сомасы 256 миллион теңгені құрайтын қызмет көрсету, құрылыс-монтаж жұмыстары мен тауар жеткізуге қатысты жалған келісімшарттар жасағаны анықталды.

Іс жүзінде бұл жұмыстар орындалмаған. Алайда бюджет қаржысы жалған актілер арқылы осы компаниялардың шоттарына аударылып, кейін қолма-қол ақшаға айналдырылған.

Жымқырылған қаржыға элиталық мүлік алынған

Күдіктілер қылмыстық жолмен алынған табыстарға:

• 6 қымбат көлік (оның ішінде Mercedes-Benz S-класс, Lexus LX570),
• Шымкент қаласының орталығынан 254 млн теңге тұратын элиталық коттедж сатып алған.

Аталған мүлікке соттың санкциясымен тұтқын салынды.

Күдіктілер үйқамаққа алынды, іс сотқа жолданды

4 күдіктіге қатысты үйқамақ түріндегі бұлтартпау шарасы қолданылды. Қылмыстық іс тергеліп бітті және сотқа жолданды.