Шетел президенттері Тоқаевты туған күнімен құттықтады
Ол бірнеше елдің басшыларымен телефон арқылы сөйлесті
17 мамырда 72 жасқа толған мемлекет басшысы Қасым-Жомарт Тоқаевты шет мемлекеттердің жетекшілері туған күнімен құттықтап, жылы лебіздерін білдірді. Бұл туралы Ақорда баспасөз қызметі жазды, деп хабарлайды Azattyq Rýhy.
Кімдер құттықтады?
Құттықтау қоңырауларын жолдағандар қатарында:
- Ресей Федерациясының президенті Владимир Путин
- Түркия президенті Режеп Тайып Ердоған
- Өзбекстан президенті Шавкат Мирзиёев
- Қырғызстан президенті Садыр Жапаров
- Тәжікстан президенті Эмомали Рахмон
- Әзербайжан президенті Ильхам Әлиев
- БАӘ вице-президенті шейх Мансур бен Заид Әл Нахаян
Мемлекет басшылары не тіледі?
Шет ел басшылары Қасым-Жомарт Тоқаевты туған күнімен шын жүректен құттықтап, Қазақстан халқына қызмет етуде жауапты мемлекеттік миссиясын сәтті жалғастыруға табыс тіледі.
«Шет мемлекеттердің басшылары Қасым-Жомарт Тоқаевты туған күнімен құттықтап, Қазақстан халқының игілігі жолындағы жауапты мемлекеттік қызметінде табыс тіледі», – делінген Ақорданың ресми хабарламасында.
Ресми шаралар өткізілген жоқ
Президенттің баспасөз қызметі бұған дейін мерекелік іс-шаралар жоспарланбағанын мәлімдеген болатын.
Айта кету керек, Тоқаевтың туған күні қарсаңында әлеуметтік желілерде нейрожелі арқылы жасалған бейнежазба тарады. Онда президенттің балалық шағынан бүгінге дейінгі өмір жолы суреттеліп, Мәскеудегі оқуы, дипломатиялық мансабы, Сенаттағы пен президенттік қызметі көрініс тапқан.
