Қаскелеңде көпқабатты үй салған компания басшылығы ірі көлемде алаяқтық жасағаны белгілі болды
Олар жарнама арқылы 100-ден астам азаматтан 972 млн теңге жинаған
Қаскелеңде көпқабатты тұрғын үйлердің құрылысы кезінде аса ірі көлемде алаяқтық жасалғаны анықталды, деп хабарлайды Azattyq Rýhy.
Қаржылық мониторинг агенттігінің мәліметінше, тергеу кезінде «Tоредо» жауапкершілігі шектеулі серіктестігінің басшылары 2021-2023 жылдары құрылысқа рұқсатсыз – яғни лицензиясыз, қажетті құжаттарсыз және жобалық-сметалық құжаттамасыз – жұмыс істегені белгілі болды.
Соған қарамастан, олар «НOME», «НOME Южный», «НOME SAU», «НOME МAK» тұрғын үй кешендерін әлеуметтік желілерде белсенді түрде жарнамалаған.
Бірыңғай тұрғын үй құрылысы операторының міндетті кепілдігі болмағанына қарамастан, олар жарнама арқылы 100-ден астам азаматтан 972 млн теңге жинаған.
Сонымен қатар, құрылыс жұмыстары талапқа сай жүргізілмей, белгіленген мерзімде аяқталмаған. Бұл жағдай үлескерлердің жаппай құқық қорғау органдарына жүгінуіне себеп болды.
«Сот санкциясымен күдіктілердің 240 млн теңгеден асатын мүлкіне тыйым салынды. Олардың ішінде 12 жер телімі, 9 автокөлік, аяқталмаған үш қабатты ғимарат және жеке тұрғын үй бар.
Қазіргі уақытта күдіктілер қамауда. Іс сотқа жіберілді.
Қылмыстық-процестік кодекстің 201-бабына сәйкес басқа мәліметтер жария етуге жатпайды», - делінген ведомство хабарламасында.
